Болоравии таниш дар Дирборн пас аз талош барои сӯзондани Қуръон
Ба иттилои «Ар-Ти», ин талоши Қӯръонсӯзӣ сабаби афзоиши таниш дар шаҳр шуд ва мусалмонони Дирборн бо паёми осоиш ва бо шиори «Дирборн барои ҳама аст» ба ин иқдом вокуниш нишон доданд.
Ин таниш дар ҳоле бештар шуд, ки дирӯз — рӯзи сешанбе — ду тазоҳурот дар кӯчаҳои Шефер ва Мичиган ба ҳам пайвастанд ва фаъолони зидди исломӣ талош карданд сокинони мусалмонро таҳрик диҳанд.
Тибқи гузоришҳои маҳаллӣ, авҷи даргирӣ аз он вақт оғоз шуд, ки Ҷек Ланг — яке аз иштирокчиёни ҳодисаи 6 январ дар ҳамла ба бинои Конгресси ИМА — ба кӯчаи Мичиган расид ва кӯшиш кард як нусхаи Қуръонро сӯзонад.
Кӯшишҳои пайдарпайи Ланг барои оташ задани Қуръон боиси дахолати мусалмонони эътирозгар шуд. Дар натиҷа, яке аз онҳо Қуръонро аз он ҷо дур бурд ва маҳалро тарк кард.
Пулис барои нигоҳ доштани оромӣ 7 гурӯҳи посбонӣро дар минтақа мустақар кард ва бо зиёд шудани танишҳо зуд дахолат намуд. Бино ба гузоришҳо, дар назди бинои шаҳрдорӣ як нафар боздошт шудааст.
Дар ҳамин ҳол, Энтони Ҳадсон — номзади ҷумҳурихоҳ барои мақоми губернатори Мичиган — пас аз ақибнишинӣ аз суханронии қаблиаш, ки дар он эътирозро «ҷанги салибӣ» хонда буд, ҷамъомади алоҳида баргузор кард.
Ӯ пештар эътирозҳоро «ҷанги салибӣ» номида буд, аммо баъди боздид аз се масҷид дар Дирборн мавқеашро тағйир дод. Ин тағйири назар Ҷек Лангро хашмгин кард ва ӯ рӯйи автобуси маъракаи Ҳадсон ибораҳои таҳқиромез навишт.
Дар тазоҳурот сокинон ва фаъолони зидди исломӣ ҳузур доштанд, дар ҳоле ки мусалмонони ширкаткунанда таъкид карданд, ки онҳо барои ҳамин омадаанд, то бигӯянд: Ислом дини сулҳ аст ва Дирборн — шаҳри ҳама аст.
Дирборн дар Мичиган аз шаҳрҳои сермиллат ба ҳисоб меравад ва шумораи зиёди арабтаборон дар он зиндагӣ мекунанд, ки онро ба яке аз бузургтарин ҷомеаҳои араб дар Иёлоти Муттаҳида табдил додааст.
4317884
