Хусусиятҳои мусобиқаи «Аҳсанул-қироат» дар Покистон

Ғуломризо Шоҳмева, аз аъзои ҳайати доварони нахустин даври мусобиқаи байналмилалии Қуръон дар Покистон, бо такя ба мушоҳидаҳои худ аз вижагиҳои барҷастаи мусобиқаи «Аҳсанул-қироат» ёдовар шуд.

Нахустин даври ин мусобиқаи байналмилалӣ бо номи «Аҳсанул-қироат» (Ҳусни қироат) аз 3 то 8-уми озар (24–29 ноябри 2025) дар шаҳри Исломобод баргузор гардид.

Дар ин мусобиқа, Ғуломризо Шоҳмеваи Исфаҳонӣ — устод ва довари байналмилалӣ — ба даъвати масъулони баргузоркунандаи рӯйдод, ҳамчун довар иштирок дошт.

Маросими анҷомёбии ин давра рӯзи 8-уми озар доир шуд ва ба ҳамин муносибат бо Ғуломризо Шоҳмева суҳбат кардем, ки матни он чунин аст:

— Ба назари шумо, зарурати баргузории мусобиқаҳои байналмилалии Қуръон дар Покистон дар чист?

Покистон аз кишварҳое аст, ки аз лиҳози шумора ва ҳавасмандии мардум ба маҳфилҳои қуръонӣ, ҳамчунин даъват аз қориёни кишварҳои гуногун — махсусан аз Эрон ва Миср — мавқеи муҳиме дорад. Бо вуҷуди ин замина, холигии як мусобиқаи ҷиддии байналмилалӣ дар ин кишвар ҳамеша эҳсос мешуд.

Чанд моҳ пеш барои баргузории як коргоҳи якҳафтаинаи омӯзишӣ барои қориёни покистонӣ ба шаҳри Равалпиндӣ сафар доштам. Дар он ҷо қориён ин суолро матраҳ карданд, ки чаро Покистон қориёни шинохташудаи сатҳи ҷаҳонӣ надорад? Ман яке аз сабабҳоро ҳамин нукта донистам, ки онҳо мусобиқаҳои байналмилалӣ надоранд, то дар миёни наврасон ва ҷавонон ангеза эҷод кунанд.

Албатта медонистам, ки баъзе созмонҳои қуръонии Покистон дар фикри таъсиси чунин мусобиқа буданд, аммо талаби қориёни ширкаткунанда дар он коргоҳ боис шуд, ки ин мусобиқа ба роҳ монда шавад.

Гарчанде соли аввали баргузорӣ буд, вале мусобиқа қобили қабул идора шуд. Баъзе масъулин — махсусан дар умури ҷойгиркунии қориён, доварон ва меҳмонон, ҳамчунин таъмин кардани амнияти ҳамаи ширкаткунандагон — кӯшиш карданд то сатҳи баргузорӣ хуб ва шоиста бошад.

— Аз дигар вижагиҳои ин мусобиқаи байналмилалии Қуръон чӣ чизҳоро метавон ном бурд?

Маблағи ҷоизаҳо нисбат ба мусобиқаҳои монанд дар Малайзия, Кувайт, Эрон ва Туркия баландтар буд. Ҷоизаҳо бо воҳиди пулии Покистон пардохт мешуданд, вале ба доллар чунин ҳисоб мешуданд:
— ҷои аввал: 17 ҳазор доллар,
— ҷои дуюм: 11 ҳазор доллар,
— ҷои сеюм: 7 ҳазор доллар.

Ба ҷойҳои чорум то шашум низ ҳазор долларӣ дода шуд. Ҷои чорумро намояндаи Афғонистон, ҷойи панҷумро намояндаи Индонезия ва ҷойи шашумро намояндаи Марокаш ба даст овард.

4319879