Дугонагии сиёсӣ дар баробари мусалмонон пас аз ҳамлаи террористии Сидней
Ба гузориши ИҚНО ба нақл аз TRT World, ҳамла ба ҷашни яҳудиён дар соҳили Бондии Сидней як ҳақиқати печидаро ошкор сохт: дар ҳоле ки хушунат як ҷашни яҳудиро ҳадаф қарор дода буд, марде, ки онро боздошт, мусалмон буд. Ин масъала сиёсати интихобгароёнаи ҳоким дар Австралияро дар мавриди чигуна гунаҳкор донистани пайравони як дин равшан кард.
Аҳмад ал-Аҳмад, мевафурӯши мусалмон ва яке аз ҳозирон дар соҳили Бондӣ, бо тирпаррон муқобила кард ва дар безарар гардондани ин ҳамла нақш дошт. Ӯ ҷони худро мустақиман ба хатар андохт.
Ин матлаб бар асоси мақолаи Сайид Анас, таҳлилгари покистонӣ, таҳия шудааст, ки матни он ба шарҳи зер аст:
Тирпарронӣ дар соҳили Бондии Сидней, ки дар рӯзи аввали ҷашни яҳудии Ҳанукка рух дод, пеш аз ҳама як фоҷиаи амиқи инсонӣ ва намунаи хушунати решадор буд.
Лаҳзае, ки барои баргузории маросими мазҳабӣ ва гирдиҳамоии ҷамъиятӣ дар назар гирифта шуда буд, ба шакли ваҳшиёна ба хун кашида шуд; ҳадди ақал 15 нафар кушта шуданд, хонаводаҳо доғдор гаштанд ва шаҳр дар мотам фурӯ рафт.
Ҳар баҳсе, ки баъд аз ин матраҳ мешавад, бояд аз ин дарк оғоз гардад: ин ҳамла ҷомеаи яҳудиро дар як замони муқаддас ҳадаф қарор дод ва қурбониён сазовори адолат ҳастанд.
Бо вуҷуди ин, таърих нишон медиҳад, ки чунин лаҳзаҳои осеби ҷамъиятӣ кам ба танҳоӣ ба азодорӣ маҳдуд мешаванд.
Дар ҷомеаҳои ғарбӣ ва бахши бузурге аз ҷаҳон, амалҳои хушунати ҷамъиятӣ ба зудӣ дар ривоятҳои сиёсӣ ҳал мешаванд, аксар вақт ҳатто пеш аз анҷоми таҳқиқоти комил ё равшан шудани ангезаҳо.
Дар тӯли чанд соат пас аз ҳамла, фазои маҷозӣ — бахусус платформаҳое мисли X — пур аз гумонзаниҳо, кинояҳо ва иттиҳомҳои ошкор алайҳи мусалмонон шуд.
Навиштаҳое, ки хушунатро ба ислом, муҳоҷират ё «ифротгароии мусалмонон» рабт медоданд, бо вуҷуди набудани далелҳои тасдиқшуда, ба суръат паҳн шуданд.
Бархе аз корбарони шабакаҳои иҷтимоӣ ҳатто наворҳое аз оташбозии марбут ба Мавлуди Масеҳро нашр карданд, то иддао намоянд, ки «исломгароён» кушта шудани яҳудиёнро дар соҳили Бондӣ ҷашн мегиранд. Бархе аз ин иттилооти нодуруст қариб ба масхара монанд буданд.
Ин вокунишҳои дур аз ҳақиқат, ҳатто дар ҳоле ки мақомот ба худдорӣ даъват мекарданд ва таҳқиқот идома дошт, шиддат гирифтанд. Он чизе, ки ин вокунишҳоро махсусан ошкор месозад, воқеияте аст, ки ин ривоятҳоро печида мекунад, вале камтар мавриди таваҷҷуҳ қарор гирифт.
Нодида гирифтани нақши як шаҳрванди мусалмон дар безарар гардондани ҳамлагар
Яке аз афроде, ки барои боздоштани ҳамлагар дахолат кард, худ мусалмон буд. Аҳмад ал-Аҳмад, мевафурӯше, ки дар соҳили Бондӣ ҳузур дошт, бо тирпаррон рӯ ба рӯ шуд ва дар халъи силоҳи ӯ кумак кард ва ҷони худро мустақиман ба хатар андохт. Амалҳои ӯ бешак ҷони бисёриҳоро наҷот дод.
Бо вуҷуди ин, нақши Ал-Аҳмад ба андозаи иттиҳомҳои беасос алайҳи мусалмонон ҳамчун як гурӯҳ, дар фазои маҷозӣ мавриди таваҷҷуҳ қарор нагирифт.
Вақте ҳамлагар мусалмон аст — ё ҳатто чунин тасаввур мешавад, — чунин ҳодисаҳо зуд ҳамчун таҳдиди тамаддунӣ тасвир мешаванд.
Дар пайи он, даъватҳо барои шадидтар кардани назорат, маҳдуд сохтани ибрози ақидаҳои мазҳабӣ ва сиёсати сахтгиронаи муҳоҷиратӣ матраҳ мегарданд.
Аммо вақте ҳамлагар мусалмон нест, мавзӯъ ба бӯҳронҳои солимии равонӣ, ҷинояткори танҳо ё ихтилолҳои равонӣ тағйир меёбад.
Натиҷа, сиёсати интихобгароёнаи хушунат аст, ки дар он ҳувият ба ҷойи далел, тафсирро муайян мекунад. Нафратпароканӣ алайҳи мусалмонон ниёз ба тасдиқ надорад; он бо тарс, ибҳом ва такрор рушд мекунад.
4323247
