Нигаронии фаластиниён аз сохтани девори ҳоили саҳюнистҳо
Ба гузориши «ИҚНО» ба нақл аз «Мидл Ист», пас аз фош шудани тарҳе аз сӯи артиши режими саҳюнистҳо дар бораи сохтани як девори ҳоили нав бо дарозии тақрибан 22 километр ва паҳнои 50 метр дар умқи минтақаи водии шимолии рӯди Урдун, мавҷи нигаронӣ миёни фаластиниён ба вуҷуд омадааст.
Ба гузориши «Ал-Араб», ҳадафи эълоншуда ва расмии ин тарҳ, ки «Нахи сурх» ном дорад, бунёди як роҳи низомӣ, хоку теппа (хокрез) ва канал ба ҳамроҳи минтақаи амниятии 20-метрӣ аз ҳар ду ҷониб унвон шудааст. Аммо фаластиниён ин иқдомро тарҳе медонанд барои ҷудо ва комилан мунзавӣ сохтани заминҳои кишоварзӣ ва минтақаҳои чарогоҳи худ аз маҳалҳои зист, зери пӯшиши иддаоҳои амниятии Тел-Авив.
Бар асоси гузоришҳои манобеи хабарӣ, кишоварзони фаластинӣ танҳо дар минтақаи «Атуф» тахмин мезананд, ки беш аз 30 ҳазор дунум (ҳар дунум тақрибан 900 метри мураббаъ) замин дар маърази таҳдиди ин тарҳи исроилӣ қарор дорад. Онҳо ҳамчунин ишора мекунанд, ки ин тарҳ дар маҷмӯъ тақрибан 190 ҳазор дунум аз тамоми водии шимолии рӯди Урдунро дар бар мегирад, ки ҳамагӣ минтақаҳои кишоварзӣ мебошанд.
Дар ҳамин ҳол, Муътаз Башорат, масъули парвандаи водии рӯди Урдун дар вилояти Тубос, дар суҳбат бо хабаргузории «Анатолӣ» таъкид кард: баррасиҳо ва бозрасиҳои қонунӣ равшан сохтанд, ки ин роҳ, ончунон ки артиши Исроил эълон кардааст, роҳи низомӣ нест; балки масире барои як девор аст, ки водии шимолии рӯди Урдунро аз Каронаи Бохтарӣ ҷудо мекунад.
Башорат тасреҳ кард: ин девор аз «Айн Шибли» — ҷое, ки дар он як пойгоҳи низомии нав таъсис ёфта ва ба як гузаргоҳи доимӣ табдил хоҳад шуд — оғоз мегардад, аз дашти Ал-Бақиа ва заминҳои Таммун ва Тубос мегузарад ва то шарқи Тиясир идома меёбад; дар ҳоле ки дарозии он 22 километр буда, паҳнояш аз ҳазор метр ҳам бештар аст.
Ӯ таъкид намуд: ин девори ҳоил қарор аст ба 22 ҷамъияти маскунӣ, ки тақрибан 600 оиларо дар бар мегирад, таъсир расонад. Ҳамчунин ҳазорҳо гектар заминҳои кишоварзӣ ва заминҳои ҳосилхези зайтун, банан ва дигар маҳсулот комилан аз дастрас хориҷ хоҳанд шуд ва чандин гектар замин низ аз заминҳои фаластиниён ҷудо мегардад.
Мақомоти фаластинӣ таъкид мекунанд, ки ин тарҳ на танҳо мусодираи заминҳост, балки таҳдиде барои ҳастӣ ва бақои фаластиниён дар минтақа ба шумор меравад ва ба маънои тасарруф ва илҳоқи ошкори заминҳои фаластиниён ба сарзаминҳои ишғолӣ аст, ки ба нобудии сабади ғизоии шумори зиёде аз фаластиниён меанҷомад.
Онҳо ҳамчунин ҳушдор медиҳанд, ки ин тарҳ ба Исроил иҷоза медиҳад назорати комили ҳавзаи обии шарқӣ — дувумин манбаи бузурги об дар Каронаи Бохтарӣ — ро ба даст гирад.
4323302
