Истиқбол аз қарорҳои зиддиисроилии шаҳрдори нави Ню-Йорк
Ба гузориши ИҚНО ба нақл аз «Ал-Ҷазира», Заҳрон Мамданӣ, шаҳрдори нави Ню-Йорк, нахустин фармони иҷроии худро ба бекор кардани бархе аз дастурҳои иҷроии Эрик Адамз, шаҳрдори пешини Ню-Йорк дар соли 2024, ихтисос дод.
Бекор кардани ин дастурҳо «Фармони иҷроии №60»-ро низ дар бар мегирад; фармоне, ки ниҳодҳои шаҳрӣ ва масъулони фондҳои бознишастагии шаҳри Ню-Йоркро аз таҳрим ё хориҷ кардани сармоя аз режими саҳюнистӣ ё ниҳодҳои вобаста ба он дар қарордодҳо ё сармоягузориҳо манъ мекард.
Ин тасмим ҳамчунин бекор кардани мамнуияти таҳрими режими саҳюнистиро дар бар мегирад, ки Адамз дар феврали соли 2024 ҷорӣ карда буд. Илова бар ин, шаҳрдори нави Ню-Йорк иҷрои таърифи «Эътилофи байналмилалии ёдбуди Ҳолокост» (IHRA)-ро аз яҳудиситезӣ, ки баъзе шаклҳои интиқод аз Исроилро зери унвони яҳудиситезӣ қарор медод, мутаваққиф кардааст.
Мамданӣ эълом кард, ки ин иқдом бо ҳадафи оғоз кардани фасли тозае дар идоракунии шаҳрӣ анҷом шудааст ва таъкид намуд, ки давлати ӯ бояд бидуни табъиз дар хидмати ҳамаи сокинони Ню-Йорк амал кунад.
Ин тасмим аз сӯи ҳомиёни ҳуқуқи фаластиниён ҳамчун қадаме ба сӯи сиёсати хориҷии мутаодил мавриди истиқбол қарор гирифтааст.
Афоф Ношир, раиси шуъбаи Ню-Йорки Шӯрои равобити исломӣ–амрикоӣ (CAIR) низ Мамданиро ба хотири бекор кардани «дастури ғайриқонунӣ, ки тавоноии нью-йоркиҳоро барои интиқод аз нажодпарастии Исроил ё таҳрими нақзи ҳуқуқи башари Исроил маҳдуд мекард» таҳсин кард.
4326828
