Таҷлили қории дорандаи иҷозатномаи қироат дар Уммон
Тибқи гузориши икно ба нақл аз рӯзномаи Уммон, ин маросим бо ташаббуси Мактаби вақфии Қуръон дар вилояти Назвӣ баргузор шуд ва дар он ғолибони сеюмин мусобиқаи Қуръонии «Нур» дар моҳи Рамазон ва гурӯҳе аз қории дорандаи иҷозатномаҳои қироатҳои Қуръонӣ дар толори масҷиди ҷомеи Султон Қобус-и Назвӣ таҷлил шуданд.
Ин барнома бо бахшҳои мухталифе, аз ҷумла тиловати Қуръон бо қироатҳои мухталиф, гузориши тасвирӣ аз раванди мусобиқаи Қуръонии Нур ва муваффақиятҳои Мактаби вақфии Қуръони Назвӣ ва иҷрои қасида ҳамроҳ буд.
Дар поёни маросим 38 нафар аз ғолибони мусобиқаи Нур ва 72 нафар аз қории дорандаи иҷозатномаи қироатҳо ба посдошти талошҳои шоёнашон дар заминаи тиловат ва таҷвид таҷлил шуданд.
Солим ибни Абдуллоҳ Аш-Шукӣ, директори барномаи Мактаби вақфии Қуръони Назвӣ изҳор дошт: Ин мусобиқа бо ҳадафи таваҷҷуҳ ба Китоби Худо ва таҳкими усул ва арзишҳои Қуръонӣ баргузор шуд ва арзёбии маҷозии ширкаткунандагон ба таҳкими раванди доварӣ ва риояти дақиқ дар имтиёздиҳӣ мусоидат кард.
Ӯ афзуд: 700 нафар дар ин рақобат ширкат карданд, ки 335 нафарашон мард ва 239 нафарашон зан буданд ва кумитаҳои тахассусӣ фазои муносибро барои рақобат, намоиши истеъдодҳо ва таҳкими маҳорати Қуръонӣ фароҳам оварданд.
Аш-Шукӣ таъкид кард: Ин талошҳо дар чорчӯби рисолати Мактаби вақфии Назвӣ барои хизмат ба Қуръон ва эҷоди муҳити таълимӣ ва ташвиқкунанда ба фаъолияти Қуръонӣ анҷом шудаанд ва мусобиқаҳои Қуръонӣ аз силсилаи барномаҳои Қуръонии мактаб бо ҳадафи тарбияи наслӣ огоҳ ва пойбанд ба арзишҳои Китоби Худо будаанд.
Гуфта мешавад, ки иҷозатномаи Қуръонӣ дар ҷаҳони араб ба афроде дода мешавад, ки ё бар хондани Қуръон мусаллатанд ва ё бар хондан ҳамроҳ бо ҳифзи комили он, ки шаҳодатномаи аввалӣ ба мактаби «Шомӣ» ва дуюмӣ ба мактаби «Ҳиҷоз ва Миср» тааллуқ дорад.
Иҷозатномаи Қуръонӣ истилоҳест, ки дар арсаи Қуръонии кишвари мо чандон шинохташуда нест, дар ҳоле ки дар ҷаҳони араб, аз ҷумла кишварҳои Миср, Сурия, Либия, Яман ва Марокаш хонандагон аз ибтидои вуруд ба арсаи Қуръонӣ бо он ошно мешаванд ва дар таҳсили улуми Қуръонӣ барои расидан ба он талош мекунанд, зеро иҷозатномаро ба манзалаи шаҳодатномае медонанд, ки донишҷӯ пас аз хатми таҳсил ба он даст меёбад.
4348901
