Нидерландия воридоти колоҳои истеҳсолшуда дар шаҳракҳои исроилиро таҳрим кард

Нидерландия рӯзи ҷумъа эълон кард, ки тиҷорати колоҳои воридшуда аз шаҳракҳои исроилиро мамнӯъ мекунад ва аз кишварҳои узви Иттиҳодияи Аврупо дархост намуд, ки иқдомоти мушобеҳ анҷом диҳанд.

Бино ба гузориши икно, ба нақл аз хабаргузории «Анадолу», Сюрд Вимер Десма, вазири тиҷорати хориҷӣ ва ҳамкориҳои рушди Нидерландия, дар як паём дар шабакаи иҷтимоии «X» навишт: «Девони вазирони Нидерландия бо таҳрими тиҷорати колоҳои истеҳсолшуда дар шаҳракҳои исроилӣ мувофиқат кардааст, зеро ин шаҳракҳо бар асоси қонунҳои байналмилалӣ ва қатъномаҳои Созмони Милали Муттаҳид ғайриқонунӣ ҳастанд».

Тибқи қонунҳои байналмилалӣ, шаҳракҳои исроилии сохташуда дар сарзаминҳое, ки Исроил дар соли 1967 ишғол кардааст, ғайриқонунӣ маҳсуб мешаванд.

Десма бо ишора ба ин ки ин тасмим паёми қавӣ ба Исроил медиҳад, таъкид кард, ки Нидерландия тамоюл надорад дар идомаи ин вазъияти ғайриқонунӣ саҳм дошта бошад.

Вай афзуд: «Девони байналмилалии додгустарӣ тасреҳ кардааст, ки ишғоли сарзаминҳои фаластинӣ ғайриқонунӣ аст ва бахшҳои васеи Каронаи Бохтариро дар бар мегирад ва бар зарурати поён додан ба ин вазъият таъкид намуд».

Десма идома дод: «Ба ҳамин далел ин иқдомотро акнун анҷом медиҳем ва ҳамчунон Аврупоро даъват мекунем, ки роҳи моро дунбол кунад».

Давлати Нидерландия таъкид кард: таҳрими колоҳои шаҳракҳо бо ҳадафи ҷилавгирӣ аз мушорикати фаъолиятҳои иқтисодии Нидерландия дар тадовуми вазъияте аст, ки бо қонунҳои байналмилалӣ муғойират дорад.

Дар ин тасмим омадааст, ки воридоти коло аз шаҳракҳои ғайриқонунии исроилӣ мамнӯъ ва хариду фурӯши колоҳои онҳо низ мутаваққиф шавад.

4353707