Тарҳи Идораи авқофи Панҷоб барои пешгирӣ аз иштибоҳҳои чопӣ ва таҳрифи маъноҳои Қуръони Карим

Идораи авқофи Панҷоб аз назорати дақиқ бар чопи Қуръони Карим ва пешгирӣ аз ҳар гуна таҳрифи лафзӣ, маънавӣ ва инчунин иштибоҳҳои чопӣ хабар дод.

Бино ба гузориши икно ба нақл аз «Нейшн», Эҳсон Бутта, мудири кулли Авқофи Панҷоб, изҳор дошт, ки тамоми имконот ва захираҳои мавҷуд барои аз байн бурдани ҳар гуна таҳрифи лафзӣ ё маънавӣ ва ҳамчунин иштибоҳҳои чопӣ дар Қуръони Карим сафарбар хоҳанд шуд.

Бутта дар суханронии худ дар панҷоҳу нуҳумин ҷаласаи Шӯрои Қуръони Панҷоб аз роҳандозии фаврии давраҳои махсуси омӯзишӣ барои баланд бардоштани маҳорати касбии мусаҳҳеҳон (баррасони матн) ва ҳамчунин таҳияи маҷмуаи фарогири дастурамалҳо хабар дод.

Ӯ инчунин дастурҳои мушаххасе барои фаъол ва пурзӯр намудани низоми назорат дар тамоми вилоят содир кард, то аз ҳар гуна беэҳтиромӣ нисбат ба Қуръони Карим пешгирӣ шуда, нигоҳдории дурусти нусхаҳои он таъмин гардад.

Ин ҳадаф тавассути ҳамкории наздик байни мақомоти маҳаллӣ ва масъулони идораи авқоф амалӣ хоҳад шуд. Илова бар ин, ӯ бар зарурати назорати ҷиддии шабакаҳои иҷтимоӣ барои пешгирӣ аз ҳар гуна фаъолиятҳои тахрибкоронае, ки метавонанд ба ҳамоҳангӣ ва ҳамзистии байни динҳо ва мазҳабҳо осеб расонанд, таъкид намуд.

Ҳофиз Зубайр Ҳасан, раиси Шӯрои Қуръони Панҷоб, дар ин маросим гуфт, ки ҳифзи матни Қуръони Карим ва таъмини чопи бенуқсони он мутобиқ ба рӯҳ ва асли воқеии Қуръон, ҳамчунон муҳимтарин вазифаи динӣ ва ҳуқуқии онҳо ба ҳисоб меравад.

Ӯ афзуд, ки ҳамаи аъзои шӯро вазифаҳои худро бо камоли кӯшиш, фидокорӣ ва ихлос анҷом медиҳанд.

Мудири кулли Авқофи Панҷоб барои соддасозӣ ва баланд бардоштани самаранокии фаъолияти шӯро дастур дод, ки кумитаҳои махсуси иборат аз аъзои шӯро барои назорат бар масъалаҳои муайяни марбут ба Қуръон таъсис дода шаванд. Ҳамчунин ӯ супориш дод, ки дар ҷаласаи оянда гузориши мустанад аз тамоми пешрафтҳо ва фаъолиятҳои анҷомшуда пешниҳод гардад.

4357650