Баргузории имтиҳонҳои шифоҳии мусобиқаҳои байналмилалии Қуръони Миср

Имтиҳонҳои ниҳоии шифоҳӣ барои интихоб ва роҳёбӣ ба даври сию сеюми мусобиқаҳои байналмилалии Қуръони Карими Миср рӯзи чоршанбе, 7-уми мурдод, дар ин кишвар баргузор мешаванд.

Ба гузориши икно бо истинод ба Сада ал-Балад, Вазорати Авқофи Миср санаи оғози имтиҳонҳои мутамаркази ниҳоии шифоҳиро барои довталабони соҳиби шароити иштирок дар даври сию сеюми мусобиқаҳои байналмилалии Қуръони ин кишвар эълон кардааст.

Дар баёнияи ин вазорат омадааст, ки ин имтиҳонҳо рӯзи чоршанбе, 29 июли соли 2026 (7-уми мурдод) дар масҷиди «Ар-Раҳма», воқеъ дар минтақаи «Боб ал-Луқ» (дар паҳлӯи бинои кӯҳнаи Вазорати Авқоф) баргузор мешаванд ва довталабон бояд соати 10:00 субҳ дар маҳалли баргузорӣ ҳозир шаванд.

Ин имтиҳонҳо аз бахшҳои ҳифзи Қуръони Карим, таҷвид ва қироат, дарки мафҳумҳои Қуръон ва шинохти сабабҳои нузули оятҳо иборат буда, афроди беҳтарин ҳамчун намояндагони Миср дар сию сеюмин мусобиқаҳои байналмилалии Қуръони ин кишвар интихоб хоҳанд шуд.

Даври сию сеюми мусобиқаҳои байналмилалии Қуръони Миср дар соли 2026 ба поси хотира ва номи Шайх Абдулфаттоҳ Шаъшаъӣ, аз қориёни маъруф ва марҳуми Миср, баргузор мегардад.

Дар баёнияи Вазорати Авқофи Миср таъкид шудааст, ки ҳадаф аз баргузории ин мусобиқаҳо дастгирии ҳофизони Қуръони Карим, густариши фарҳанги қуръонӣ ва ташвиқи истеъдодҳои қуръонӣ ба ҳифз, тадаббур ва дарки маъноҳои оятҳои илоҳӣ мебошад.

Қобили зикр аст, ки давраҳои гуногуни мусобиқаҳои байналмилалии ҳифз ва қироати Қуръони Миср то имрӯз ба поси ёд ва номи қориёни бузурги мисрӣ баргузор шудаанд. Аз ҷумла, даври бисту шашум ба номи Шайх Маҳмуд Халил ал-Ҳусарӣ, даври бисту ҳафтум ба номи устод Абдулбосит Абдуссамад ва даври сию дуюм ба поси хотираи устод Шаҳот Муҳаммад Анвар, қории маъруф ва марҳуми Миср ва ҷаҳони ислом, баргузор гардид.

4366690