Сабти тиловати мурраттали қориён дар Радиои Қуръони Уммон
Ба гузориши хабаргузории икно ба нақл аз рӯзномаи «Аш-Шабиба», Радиои Қуръони Уммон рӯзи сешанбе, 6-уми мурод, бистумин солгарди таъсиси худро ҷашн гирифт. Ин расона, ки ду даҳсола аз оғози фаъолияти он мегузарад, бо таҳия ва пахши барномаҳо дар заминаи Қуръон ва улуми қуръонӣ, инчунин пахши тиловати Қуръони Карим бо сабкҳои гуногун аз ҷониби қориёни синну соли мухталиф, дар баробари маҷмӯи барномаҳои ҳадафманд, ба шунавандагони худ хизмат мерасонад.
Ин шабакаи радиоӣ пахши барномаҳои худро аз соли 2006 бо ҳафт соат дар як шабонарӯз оғоз кард ва аз 1-уми январи соли 2014 вақти пахши он ба 24 соат дар як шабонарӯз расонида шуд.
Барномаҳои Радиои Қуръони Уммон тавассути 28 истгоҳи пахшкунанда, ки тамоми вилоятҳои Уммонро фаро мегиранд, инчунин тавассути моҳвора ва платформаи рақамии «Айн» барои шунавандагони дохил ва хориҷи кишвар пахш мешаванд.
Аҳмад ибни Маҳно ал-Кандӣ, мудири Идораи Радиои Қуръони Уммон дар Раёсати кулли радиоии Вазорати иттилооти ин кишвар, таъкид кард, ки бистумин солгарди таъсиси ин шабака марҳилаи муҳиме дар фаъолияти расонаии он ба шумор меравад. Ба гуфтаи ӯ, Радиои Қуръон аз рӯзи таъсисаш худро муваззаф донистааст, ки минбари густариши фарҳанги Қуръон, таҳкими арзишҳои сулҳпарваронаи Ислом ва пешниҳоди муҳтавои саҳеҳу илмии қуръонӣ бошад.
Ал-Кандӣ ҳамчунин тавзеҳ дод, ки ин радио дар тӯли фаъолияти худ ҳам аз лиҳози соатҳои пахш ва ҳам аз ҷиҳати сифати муҳтаво пайваста рушд кардааст ва барои дастрасӣ ба шунавандагон дар ҳар куҷо аз платформаҳои гуногун ва усулҳои муосири пахш истифода мебарад.
Ӯ афзуд, ки китобхонаи садоии Радиои Қуръони Уммон дорои тиловатҳои Қуръони Карим аз қориёни ҷаҳони Ислом бо ривоятҳои гуногуни қироат мебошад, ки маҷмӯаи нодир ва арзишманд дар ин замина ба ҳисоб меравад.
Мудири Идораи Радиои Қуръони Уммон дар бораи дастгирӣ ва тавонмандсозии қориёни уммонӣ гуфт, ки ин радио илова бар омода намудани нусхаҳои Қуръон бо қироатҳои Ҳафс аз Осим ва Қолун, ба сабти тиловатҳои қориёни уммонӣ аз вилоятҳо ва гурӯҳҳои синнии гуногун низ аҳаммияти зиёд медиҳад.
Вай афзуд, Радиои Қуръон барои қориёни уммонӣ имконият фароҳам овардааст, ки ҳам ҳангоми сабти тиловат ва ҳам баъд аз он бар раванди тасдиқ ва назорати тиловатҳои худ иштирок намоянд.
Ал-Кандӣ инчунин гуфт, ки Кумитаи интихоби қориён дар Радио ва Телевизиони Уммон аз гурӯҳи устодони варзида ва мутахассиси илми қироатҳои Қуръон иборат буда, ҳамаи онҳо аз қориёни расмии радио мебошанд.
Бино ба гузориши Хабаргузории Уммон, Радиои Қуръон дар пурсиши афкори умумӣ оид ба муҳтавои барномаҳои Радио ва Телевизиони Уммон, ки аз ҷониби Маркази миллии омор ва иттилооти Уммон дар соли 2025 гузаронида шуд, баландтарин сатҳи қаноатмандии шунавандагонро ба даст овард.
4366838