Domin nuna goyon baya ga Falasdinu, Maldives sun toshe matafiya Isra'ila
Matakin da mahukuntan Maldibiya suka bayyana a matsayin nunin "tabbatacciyar hadin kai" ga Falasdinawa, na nuni da wani gagarumin matsayi na diflomasiyya dangane da yakin da Isra'ila ke ci gaba da yi a Gaza.
Shugaban kasar Mohamed Muizzu ya sanar da matakin a jiya Talata, yana mai cewa manufar tana nuna adawar da al'ummar kasar ke yi na ci gaba da cin zarafi da kisan kiyasi da Haramtacciyar Kasar Isra'ila ke ci gaba da yi kan al'ummar Palasdinu. Ofishinsa ya jaddada cewa dokar ta nuna tsayuwar gwamnati kuma za ta fara aiki nan take.
A cewar wata sanarwa da ofishin shugaban kasar ya fitar, matakin yana wakiltar “a fili karara na matsayinmu na adawa da ta’addancin da ake ci gaba da yi a kasar Falasdinu” kuma ya nuna yadda kasar ke ci gaba da ba da shawarar daukar matakin da ya dace kan keta dokokin kasa da kasa.
Sanarwar ta ce, Maldives na ci gaba da yin tofin Allah tsine kan cin zarafin da Isra'ila ke yi a dandalin duniya.
Majalisar Jama'a (Majalisar Dokokin Maldives) ta amince da kudirin cikin gaggawa kafin shugaban kasa ya amince da shi.
Mai magana da yawun shugaba Muizzu ya sake jaddada aniyarsa kan wannan manufa, inda ya bayyana goyon bayansa a kai a kai ga samar da ‘yantacciyar kasar Falasdinu bisa kudurorin Majalisar Dinkin Duniya da ka’idojin dokokin kasa da kasa.
Ko da yake Maldives sun yanke huldar diflomasiyya da Isra'ila a shekarun 1970, a baya an ba 'yan Isra'ila damar ziyartar tsibirin tekun Indiya. Sabuwar dokar da aka amince da ita ta sauya wannan manufar.
