Mensahe ni Imam Khomeini na Nagmula sa Quran: Sachedina
Si Professor Sachedina, isang pangunahing iskolar ng Islam sa larangan ng paghahambing na mga pag-aaral na Islamiko, Teolohiya ng Shia, bioetika, at karapatang pantao, ay pumanaw sa edad na 83 sa Virginia noong Miyerkules. Itinuturing siya bilang isa sa pinaka-makabuluhang iskolar ng Islam sa kasalukuyang panahon. Ipinanganak sa isang pamilyang Shia na may lahing Indiano sa Tanzania, Silangang Aprika noong 1942, doon niya natanggap ang kanyang unang edukasyon.
Ang kanyang paglaking nakalubog sa iba’t ibang mga kultura ay nagpakilala sa kanya mula pagkabata sa mga usapin ng identidad, pagpapasensiya, at diyalogo sa pagitan ng mga pananampalataya —mga temang humubog sa buong buhay-akademiko niya. Bilang kabataan, lumipat siya sa India upang mag-aral ng makataong sining sa Aligarh Muslim University.
Pagkatapos, naglakbay siya sa Iran upang palalimin ang kanyang pag-unawa sa Shiismo, nag-aral sa parehong seminaryo at mga kursong unibersidad sa Ferdowsi University ng Mashhad. Sa panahong ito nagsimulang mabuo ang kanyang sinadyang pagsasanib ng “pag-aaral ng teksto” at “pamamaraang pang-akademiko.” Isang mahalagang hakbang sa kanyang intelektuwal na landas ang paglipat niya sa Canada, kung saan tinapos niya ang masteral at doktoral na pag-aaral sa University of Toronto.
Ang kanyang disertasyon sa PhD tungkol sa “pag-unlad ng Mahdismo sa Imami Shiismo” ay kalaunang naging batayan ng kanyang maimpluwensiyang aklat na Mesiyasismong Islamiko.
Sinimulan ni Sachedina ang kanyang akademikong karera noong dekada 1970 at nagturo nang mahigit tatlong mga dekada sa University of Virginia bilang propesor ng mga pag-aaral sa relihiyon.
Kalaunan, sumali siya sa George Mason University bilang humahawak ng Tagapangulo sa Pag-aaral na Islamiko ng IIIT. Sinasaklaw ng kanyang pagtuturo ang malawak na hanay ng mga larangan, kabilang ang Teolohiyang Islamiko (Shia at Sunni), kasaysayan ng kaisipang Islamiko, Islamikong bioetika, Islam at karapatang pantao, pluralismo sa relihiyon, at paghahambing na mga pag-aaral sa Quran.
Bukod sa pagtuturo, gumanap siya ng aktibong papel sa pagtatatag ng mga institusyong intelektuwal, diyalogo sa pagitan ng mga pananampalataya, at mga komite ng etikang medikal.
Sa napakarami niyang mga publikasyon, ilan sa pinaka-kilala ay Islamic Messianism: The Idea of Mahdi in Twelver Shi‘ism, The Just Ruler in Shi‘ite Islam, Islamic Biomedical Ethics, Islamic Roots of Democratic Pluralism, at Islam and the Challenge of Human Rights. Nagsulat din siya ng maraming artikulo tungkol sa etika, makabagong hurisprudensiya, comparative theology, at interfaith studies.
Sa isang panayam ng IQNA noong 2015, tinalakay niya ang pandaigdigan na mensahe ng yumaong tagapagtatag ng Islamikong Republika ng Iran, si Imam Khomeini (RA).
Nakausap niya ang IQNA sa gilid ng isang pandaigdigang kumperensiyang ginanap sa Tehran noong taong iyon na may temang “The Holy Quran in the Life and Thought of Imam Khomeini (RA).” Sinabi niya, “Inanyayahan ako sa kumperensiyang ito upang iharap ang isang artikulo tungkol sa ugnayan ng dakilang pinuno ng Islamikong Rebolusyon ng Iran (Imam Khomeini) at ng Banal na Quran. Naniniwala ako na ang kumperensiyang ito ay isang napakahalagang pangyayari dahil nasa isang panahon tayo na dapat nating balikan si Imam Khomeini (RA) at ang Quran upang malaman natin nang tiyak kung ano ang nilalaman ng Quran na ginamit ni Imam Khomeini sa kanyang rebolusyon at isinama niya sa kanyang mithiin para sa bansang Iran at sa mga Muslim sa buong mundo.”
Dagdag ni Sachedina, “Sa pananaw ng yumaong Imam, ang Quran ay napakahalaga bilang pinagmumulan ng inspirasyon, at ang mensahe ng Imam, na alin nagmula sa Quran, ay pandaigdigan at nakatuon sa lahat ng mga Muslim sa anumang panig ng mundo. Maaari pa akong magpatuloy at sabihing kung sinuman sa makabagong panahon ang nag-iisip tungkol sa espirituwal na larangan ng pag-iral ng tao at sa mensaheng inilahad ng Quran tungkol sa espirituwalidad, maaari niyang pakinggan ang mensahe ni Imam Khomeini, na hinango mula sa Quran.”
Dagdag pa ni Sachedina, “Sa dala kong karanasan sa edad na 73 at sa pamumuhay ko sa iba’t ibang mga bahagi ng mundo, maipagmamalaki ko ngayon ang mga itinuro sa atin ni Imam Khomeini noon. Ang mga itinuro ng Imam ay pandaigdigan. Itinuro niya na ituon natin ang ating pansin sa tao bilang ubod ng paglikha ng Diyos. Ang tao ang mahalaga dahil siya ang kinatawan ng Diyos sa mundo at ang espiritu ng Diyos ay dumadaloy sa kanya.”
Tinukoy ni Sachedina ang talata 70 ng Banal na Surah Al-Isra at sinabi: Ipinagkaloob ng Diyos ang dangal at paggalang sa lahat ng mga tao, anuman ang kasarian, lahi, etnisidad, paniniwala, at iba pa. “Ang salitang ‘Adam’ sa Quran ay kumakatawan sa pangngalang tumutukoy sa buong sangkatauhan. Ito ang parehong diwa ng Quran na makikita rin sa mensahe ni Imam Khomeini (RA).”
