Ифтитоҳи мактабхонаи қуръонии «Аҳмад Нуайнаъ» дар шаҳри «Аш-Шаруқ»-и Миср
Ба гузориши ИКНА, ба нақл аз Ал-Мисрӣ Ал-Явм, Усома Ал-Азҳарӣ, вазири авқофи Миср, дирӯз, 8 феврал, дар маросими ифтитоҳи ин мактабхона (маркази омӯзиши ҳифзи Қуръон) изҳор дошт:
"Мактабхонаҳо танҳо ҷойҳое барои ҳифзи Қуръон нестанд, балки муассисаҳои комили таълимӣ ва тарбиявие мебошанд, ки насли огоҳ ва мутамаддинро тарбия мекунанд ва имон, илм ва ахлоқро дар як ҷо ҷамъ месозанд."
Вай афзуд, ки ин мактабхона дар чорчӯби таваҷҷуҳи Вазорати авқофи Миср ба ҳифзи Қуръон ва таҳкими арзишҳои динӣ ифтитоҳ шудааст.
Вазири авқоф ифтитоҳи мактабхонаи Аҳмад Нуайнаъро ба ин қории маъруфи мисрӣ табрик гуфта, талошҳои ӯро дар хидмат ба Қуръон сутуд ва гуфт:
"Ифтитоҳи мактабхонаҳои сершумори қуръонӣ бо номи Шайх Аҳмад Нуайнаъ, бо таваҷҷуҳ ба ҷойгоҳи марде, ки тамоми умри худро дар хидмати Қуръон ва муҳаббати холисона ба каломи ваҳй сарф кардааст, ғайриоддӣ нест."
Усома Ал-Азҳарӣ ҳамчунин таъкид кард, ки Аҳмад Нуайнаъ аз бозмондагони мактаби машоҳири қуръонии Миср мебошад – мактабе, ки дар ҷаҳон ҳамто надорад.
Дар идомаи маросим, Аҳмад Нуайнаъ аз вазири авқофи Миср барои ибтикори ӯ дар эҳёи мактабхонаҳои қуръонӣ изҳори сипос карда, таъкид намуд:
"Мо истиқболи зиёдеро аз устонҳои мухталиф барои муваффақияти ин ибтикор ва эҳёи ин биноҳои илмии қадимӣ мушоҳида кардем ва ин маконҳо ҳамчунон манораҳое барои интишори илм, ахлоқ ва Қуръон хоҳанд монд."
