Дархости таҳрими хурмои исроилӣ дар остонаи моҳи Рамазон
Ба гузориши ИКНА, иқтибос аз "Шаҳоб Нюз", Созмони ҳамбастагӣ бо Фаластин эълом кард: аксари хурмои Исроил (Фаластини ишғолшуда) дар шаҳракҳои ғайриқонунии Каронаи Ғарбии ишғолшуда аз ҷониби шаҳракнишинони исроилӣ кишт мешавад ва фаолон пайваста ба мардум ҳушдор медиҳанд, ки қабл аз харид, барчаспҳои нишондиҳандаи манбаи хурморо мавриди баррасӣ қарор диҳанд.
Яке аз истеҳсолкунандагони хурмои исроилӣ ба рӯзномаи "Ҳааретс" гуфтааст: "Созмонҳое ҳастанд, ки ба супермаркетҳои Аврупо мераванд, ки дар он хурмо бо бренди мо мавҷуд аст ва барчаспҳое мечаспонанд, ки харидоронро дар қатли ом шарик нишон медиҳад."
Бар асоси баёнияи гурӯҳи ҳомиёни Фаластин дар Лондон бо номи FOA, Фаластини ишғолшуда бузургтарин тавлидкунандаи хурмои маҷул дар ҷаҳон мебошад ва бештари ин хурмо ба Аврупо содирот шуда, ҳам дар супермаркетҳои бузург ва ҳам дар мағозаҳои хурд фурӯхта мешавад.
Тибқи гузориши FOA, панҷоҳ дарсади хурмои қаламравҳои ишғолшуда ба Аврупо содирот мешавад, ки бахши зиёди онро Англия, Нидерланд, Фаронса, Испания ва Италия ворид мекунанд. Дар соли 2020 беш аз 3000 тонна хурмо ба арзиши тахминӣ 7,5 миллион фунт стерлинг (8,9 миллион доллар) аз Фаластини ишғолшуда ба Англия ворид шудааст.
Тахмин зада мешавад, ки Исроил солона беш аз 100 ҳазор тонна хурмо истеҳсол мекунад ва даромади солонаи ин кишвар аз фурӯши хурмо ба 100 миллион доллар мерасад, ки аксари он дар моҳи мубораки Рамазон фурӯхта мешавад.
