Паёми шайхи Ал-Азҳар ба муносибати фаро расидани моҳи мубораки Рамазон
Ба гузориши ИКНА, ба нақл аз "Арабӣ 21", Аҳмад Ат-Тайиб, шайхи Ал-Азҳар, бо ирсоли паёме хитоб ба кишварҳои исломӣ ба муносибати фаро расидани моҳи мубораки Рамазон, онҳоро ба ваҳдат ва таҳкими пайвандҳои бародарӣ фаро хонд.
Шайхи Ал-Азҳар дар паёме, ки дар шабакаи иҷтимоии X мунташир кард, аз мусулмонон хост, ки бародарони фаластинии худро фаромӯш накунанд ва дар ин айёми муборак аз лаҳзаҳои худ барои дуо кардан ба нафъи фаластиниҳо истифода кунанд ва аз Худованд бихоҳанд, ки онҳоро бар душманонашон пирӯз гардонад ва дар канори хонаводаҳояшон дар сарзаминашон собит кунад.
Вай ҳамчунин дуо кард, ки Худованд онҳоро аз шарри нақшаҳои касоне, ки маънои тааллуқ ба ватан ва ватанпарастиро намедонанд ва қасди муҳоҷир кардани онҳо аз Ғаззаро доранд, ҳифз кунад.
Шайхи Ал-Азҳар фаро расидани моҳи мубораки Рамазонро ба Абдулфаттоҳ Ас-Сисӣ, раисиҷумҳури ин кишвар, ҳамчунин ба раҳбарон ва миллатҳои исломӣ ва арабӣ табрик гуфт.
Арабистони Саудӣ ва 17 кишвари арабӣ шоми ҷумъа эълом карданд, ки пас аз дидани ҳилоли моҳ, имрӯз (шанбе) рӯзи аввали моҳи мубораки Рамазон мебошад.
Мақомоти кишварҳои Арабистони Саудӣ, Миср, Қатар, Иморот, султоннишини Умон, Баҳрайн, Кувайт, Фаластин, Яман, Ироқ, Урдун, Сурия, Лубнон, Судон, Либия, Тунис, Алҷазоир ва Сомалӣ дар баёнияҳое имрӯзро рӯзи оғози моҳи мубораки Рамазон эълом карданд.
Ин дар ҳолест, ки Марокаш эълом кард, пас аз дида нашудани ҳилоли моҳ дар шоми ҷумъа, рӯзи якшанбе аввалин рӯзи моҳи мубораки Рамазон хоҳад буд. Ҳамчунин, шиаёни Лубнон ва Ироқ моҳи Рамазонро аз рӯзи якшанбе оғоз мекунанд.
