Нигоҳе ба филми «Маҷмаи кардиналҳо» ба муносибати даргузашти Попи Франсис
Ба гузориши ИКНА, ин филм бар асоси романе ба ҳамин ном аст, ки Роберт Ҳаррис дар соли 2016 навиштааст. Мавзӯи асосии филм марги Поп, раҳбари католикҳои ҷаҳон аст, ки барои интихоби ҷонишини ӯ маҷмаае аз кардиналҳои баландмақом дар Ватикан гирди ҳам меоянд.
Фароянд ва муҳити интихоботи Поп
Аз нигоҳи католикҳои масеҳӣ ва бархе аз мардумони ҷаҳон, Ватикан маконе муқаддас ва асрорнок аст. Бо вуҷуди ҳузури доимии сайёҳон дар тамоми фаслҳои сол, мардуми оддӣ дар раванди интихоби раҳбари калисои католикӣ ҳеҷ нақше надоранд. Ин фақат кардиналҳо ва бузургони масеҳият ҳастанд, ки дар паси дарҳои баста Попро интихоб мекунанд.
Аз ҷиҳати ҷолиб, филм муқаддасоти калисо ва мақоми кардиналиро барканор мекунад ва парда аз рӯйи асрори пушти пардаи Ватикан, ки ҳамеша махфӣ монда буданд, бармедорад.
Аз оғози достон, бо ҷамъ шудани кардиналҳо ва усқуфони аъзам, марҳалаҳои интихоби Попи нав дар баробари таҳлили шахсияти довталабон ва талошҳои онҳо барои ҷалби раъй ва расидан ба ин мақоми баланд нишон дода мешавад.
Кишишон ба ҳайси инсонҳои одӣ бо гуноҳҳои маъмулӣ ба тасвир кашида мешаванд ва ахлоқи зиштеро чун ҳасад, дурӯғ, риё, кинатӯзӣ ва ташнагии қудрат доранд. Баъзан дар ҳоли кашидани сигор ё шаробнӯшӣ низ намоиш дода мешаванд.
Мусиқии филм ва фазосозии он
Мусиқии филмро оҳангсози олмонӣ бо номи Фолкер Бертелманн эҷод кардааст, ки дар тасвири фазо ва эҷоди рӯҳияи маънавӣ ва асрорнок нақши муҳим бозӣ мекунад. Равшаннамоии хуб ва тавоно ҳамроҳ бо ин мусиқӣ саҳнаҳои тамошобоб ва таъсиргузореро ба вуҷуд меорад.
Ҷои баргузории маҷмаъ ва тадобири он
Тақрибан 15 то 20 рӯз пас аз даргузашти Поп, маҷмааи кардиналҳо одатан дар калисои хурди Систин дар қалби Ватикан баргузор мешавад. Ин раванд мумкин аст якчанд рӯз идома ёбад ва кардиналҳо дар он ҷо иқомат мекунанд. Дар ин муддат фақат шабҳо метавонанд бо сокинони дигари Ватикан дар иртибот бошанд, вале то қабули тасмими ниҳоӣ ҳаққи берунравӣ аз бинои асосиро надоранд.
Ин маҷмаа зери тадобири шадиди амниятӣ баргузор мешавад ва ҳар гуна таҷҳизоти шунавоӣ аз калисо берун бурда мешавад. Кардиналҳо савганд ёд мекунанд ва ӯҳдадор мешаванд, ки чизе аз ин маҷлис ба хориҷ рӯ надиҳанд. Онҳо дар ин муддат ба радио, телевизион ва телефон дастрасӣ надоранд ва ҳаққи сӯҳбат бо расонаҳоро низ надоранд.
Чӣ гуна маҷмаъ кор мекунад?
Ҳар рӯз ду маротиба субҳ ва ду маротиба шом овоздиҳӣ дар ҳамин калисои хурд анҷом мешавад. Ҳар як кардинал метавонад ба ҳар кардинали дигар овоз диҳад ва ин раъйгирӣ то замоне идома меёбад, ки ду се ҳиссаи раъйҳо ба як нафар расад.
Чӣ гуна ҷаҳон аз интихоби Попи нав бохабар мешавад?
Пеш аз ҳар овоздиҳии навбатӣ, раъйҳои қаблӣ сӯзонда мешаванд ва ҳар рӯз дуд аз болои сақфи калисо хориҷ мешавад. Дуди сиёҳ ба маънои ин аст, ки ҳанӯз тасмими ниҳоӣ гирифта нашудааст, ва дуди сафед нишонаи интихоб шудани Попи нав аст. Занги калисо низ ба садо медарояд, то агар дуди хокистарранг берун шавад, касе иштибоҳ накунад.
Баъд аз интихоб, кардинали аъзам аз шахси интихобшуда мепурсад: «Оё интихобро мепазирӣ?» Ва дар сурати пазируфтани интихоб, Попи нав, пас аз интихоби номи худ, бо либоси Поп дар балкони Ватикан, дар майдони Сент-Петро ҳозир мешавад.
Паёмҳои таслият ба муносибати даргузашти Попи Франсис
Шайхи Алазҳар, Оятуллоҳ Систонӣ, Ҳамос, Ҳизбуллоҳ, Оятуллоҳ Аърофӣ, мудири ҳавзаҳои илмияи Эрон ва бисёре дигар аз шахсиятҳои мазҳабӣ ва сиёсӣ аз саросари ҷаҳон ба муносибати даргузашти Попи Франсис паёми таслият ирсол карданд.
