Эҳдои Қуръони таърихии Узбекистон ба Маҷмаи Қуръони Карими Шорҷа
Ба гузориши ИКНА ба нақл аз «Ҳолул-Халиҷ», Фирдавс Абдулхолиқов, раиси Маркази тамаддуни исломӣ дар Узбекистон, нусхае аз Қуръони хаттии «Катта Лангар»-ро ба Маҷмаи Қуръони Карими Шорҷа эҳдо намуд. Ин иқдом дар ҷараёни боздиди Абдулхолиқов ва ҳайати ҳамроҳи ӯ аз Маҷмаи Қуръон анҷом шуд.
Абдулло Халаф Ал-Ҳусайнӣ, дабири кулли Маҷмаи Қуръони Шорҷа, дар маросими истиқбол аз ин ҳайат, нақши муассисаро дар тарвиҷи фарҳанги исломӣ ва хидмат ба Қуръони Карим тавассути таҳқиқот ва омӯзишҳои қуръонӣ, Маркази байналмилалии тиловати электронӣ дар Шорҷа, осорхонаҳо, ҳамоишҳо ва семинарҳои ихтисосии тиловати Қуръон ва давраҳои тафсири балоғатӣ ташреҳ кард.
Фирдавс Абдулхолиқов бо таъкид бар ин ки Маҷмаи Қуръон як муассисаи бузурги омӯзишист, ки нураш ба тамоми ҷаҳон мерасад, изҳори умедворӣ намуд, ки роҳҳое барои ҳамкориҳои муштарак миёни Маҷма ва Маркази тамаддуни исломии Узбекистон боз шавад.
Қуръони «Катта Лангар» номи худро аз масҷиди «Лангар Ота» дар минтақаи Кашқадарёи Узбекистон гирифтааст. Муҳаққиқон таърихи ин нусхаи хаттиро ба чаҳоряки охири қарни ҳаштуми милодӣ нисбат медиҳанд, ки мувофиқ бо давраи шаклгирии қавоиди забони арабӣ аст. Ҳаштоду як саҳифаи ин нусха дар ҳоли ҳозир дар Пажӯҳишгоҳи нусхаҳои хаттии шарқии Академияи илмҳои Русия дар Санкт-Петербург нигоҳдорӣ мешавад.
Матни ин Қуръон бо хатти куфии ҳиҷозӣ, ки қадимтарин шакли хатти арабӣ ба шумор меравад, бар рӯи пӯсти гов ва бо андозаи 52.5 бар 34.0 сантиметр китобат шудааст.
Қадимати муҳри чармии ин нусха ба қарни чаҳордаҳи милодӣ бармегардад ва дар миёнаи қарни ҳабдаҳум бозсозӣ шудааст. Ин Қуръон иборат аз оятҳое аз 44 сура аст, ки 22 сураи он комил мебошад.
Дар соли 2024, тамоми саҳифаҳои боқимондаи ин нусха дар Русия ва Узбекистон ба таври якпорча мунташир шуд ва теъдоди маҳдуде аз он барои тақсим миёни муассисаҳои илмӣ, мазҳабӣ ва пажӯҳишии алоқаманд ба омӯзишҳои қуръонӣ ва фарҳанги исломӣ дар саросари ҷаҳон нашр гардид.
