Хаттоти баҳрайнӣ: Рӯнависии Қуръон боиси афзоиши алоқамандон ба хаттотии забони арабӣ шудааст
Ба гузориши ИҚНА ба нақл аз Ал-Ватан, Иброҳим Муҳаммад Убайд, хаттоти баҳрайнӣ, дар хонаводае парвариш ёфтааст, ки соҳиби бархе аз бузургтарин китобхонаҳои Баҳрайн, аз ҷумла китобхонаи миллӣ, китобхонаи Баҳрайн, китобхонаи насли нав ва китобхонаи Убайд ҳастанд.
Ӯ инчунин китобхонаи худро таъсис дод, ки аз ин ҷиҳат беназир аст, ки аввалин китобхона аз ин навъ дар Баҳрайн ва минтақаи халиҷи Форс маҳсуб мешавад; китобхонае, ки китобҳои хаттотишуда ва ҳар чизе, ки мавриди таваҷҷуҳи хаттотон ва дӯстдорони хаттотии арабӣ аст, дар бар мегирад.
Ӯ дар гуфтугӯ бо рӯзномаи Ал-Ватан Баҳрайн гуфт: дар соли 2014 китобхонаи "Ал-Хаттот" ро таъсис додам, ки идомаи китобхонаи машҳури Убайд аст; китобхоне, ки падарам онро дар соли 1961 ифтитоҳ кард ва то соли 2013 фаъолият дошт ва сипас ба далели бемории падарам баста шуд. Ин китобхона дар воқеъ идомаи китобхонаи миллиест, ки бобоям Иброҳим Муҳаммад Убайд дар соли 1929 таъсис дода буд.
Ӯ меафзояд: хонаводаи мо, ба таъбире, як хонаводаи китобдорӣ аст ва амакамон ва бобои модариам низ дар ҳамин замина фаъолият мекарданд.
Ин хаттоти баҳрайнӣ дар бахше аз гуфтугӯи худ дар бораи хаттоти Қуръони Карим гуфт: дар давраи пандемияи коронавирус ва карантин вақти зиёде доштам. Ба рӯнависии Қуръони Карим шуруъ кардам. Ҷои махсусе омода сохтам ва бо тавозӯи ҳамешагӣ рӯйи навиштани Қуръон тамаркуз намудам. 67 саҳифа навиштам ва баъд аз бозбинӣ дарёфтам, ки иштибоҳоте вуҷуд дорад ва баъзе ҳаракатҳо ё ҳарфҳо аз қалам афтодааст. Ин масъала маро ба фикр фаровард.
Ӯ меафзояд: аз худ пурсидам чаро Қуръони Карим танҳо аз ҷониби хаттотон навишта мешавад? Чаро ин ҳаққи ихтисосии онҳо бошад? Чаро ҳар яки мо натавонем нусхаи худро аз Қуръони Карим нависем? Дар воқеъ, Худованд маро ба идеяе ҳидоят кард ва он ин буд, ки ҷузъи 30-уми Қуръони Каримро ба тарзе чоп кунам, ки дигарон битавонанд онро бо хатти худ пур кунанд ва навиштаи шахсии худро аз Қуръон дошта бошанд. Ҳамчунин, ин роҳ кумак мекунад, ки ҳеҷ калима ё ҳарфе аз қалам наафтад.
Ӯ бо ишора ба ин ки намунаҳое аз ин идеяро ба кишварҳои Қирғизистон, Босния, Туркия ва Покистон фиристодааст, таъкид кард, ки ин идея ба таври чашмгире мавриди истиқболи мардум қарор гирифта ва бисёре аз афрод ба хаттотии забони арабӣ алоқаманд шудаанд.
https://iqna.ir/00Hx3R
