Саркӯби мусулмонон аз сӯи пулиси Ҳинд дар иёлати Роҷистон
Ба гузориши ИКНА ба нақл аз Ал-Ҷазира, пас аз он ки Балмуконд Очория, намояндаи порлумон аз ҳизби ҳокими Бҳаратия Ҷаната (BJP) ва шинохташуда бо мавқеъгирии зидди исломӣ, ба як масҷиди барҷаста дар шаҳри Ҷайпур — маркази иёлати Роҷистон — беҳурматӣ кард, хашми мусулмонон барангехта шуд ва тазоҳуроти густардае анҷом гирифт, ки бо саркӯбии шадиди пулис ба авҷ расид.
Қазия аз онҷо шурӯъ шуд, ки Очория пас аз як раҳпаймоии эътирозӣ бо шумори зиёде аз тарафдоронаш вориди масҷид шуд. Онҳо ба деворҳои масҷид постерҳое бо шиори «Марг бар Покистон» часбонданд ва дар дохили саҳни масҷид шиорҳои таҳрикдиҳанда доданд — амале, ки ҳозирон дар масҷид онро тавҳин ба эҳсосоти мазҳабии худ донистанд.
Очория дар як изҳорот иддао кард, ки ин иқдомаш дар посух ба ҳамла ба сайёҳон дар Паҳалгам, Кашмир, дар санаи 22 апрел сурат гирифтааст ва илова кард, ки ҳадафаш эҳтиром ба қурбониён ва маҳкум кардани терроризм будааст.
Бо ин вуҷуд, вақте маълум шуд, ки мақомот Очорияро боздошт накардаанд, мавҷи нави тазоҳурот оғоз шуд ва пулис маҷбур шуд барои пароканда кардани издиҳоме, ки дар бозори Ҷавоҳирӣ ҷамъ шуда буд, аз зӯр ва калтак истифода кунад.
Очория, ки намояндаи ҳавзаи интихоботии Ҳава Маҳал дар Роҷистон аст, қаблан маъракаҳоеро алайҳи истеъмоли гӯшт, истифодаи баландгӯяк дар масоҷид, пӯшидани ҳиҷоб аз ҷониби духтарони мусулмон дар мактабҳо ва ҳамчунин ихроҷи паноҳҷӯёни бенглодешӣ ва рӯҳингия аз Ҷайпур раҳбарӣ кардааст.
