Ҳузури Бӯстони қуръонии Қатар дар намоишгоҳи Донишгоҳи Ал-Азҳар
Ба гузориши ИКНА ба нақл аз рӯзномаи Аш-Шарқ, ин намоишгоҳ дар ҳавлӣ ва фазои Донишкадаи кишоварзии Донишгоҳи Ал-Азҳар баргузор шуд ва Бӯстони набототи қуръонии Қатар ҳамчун узве аз Донишгоҳи Ҳамад ибни Халифа, ки вобаста ба Бунёди таълим, улуми инсонӣ ва тавсеаи ҷомеаи Қатар аст, дар он ҳузур ёфт.
Дар ин намоишгоҳ, бӯстон гузорише аз фаъолиятҳо ва барномаҳои худ барои ҳифзи набототи зикршуда дар Қуръон ва аҳодис, ҳамчунин гиёҳҳои маҳаллии Қатарро пешниҳод кард.
Ҳамчунин намунаҳое аз тухми набототе, ки дар хатароти нобудӣ қарор доранд ва дар Бонки тухми Қатар нигоҳдорӣ мешаванд, бо ҳадафи ба намоиш гузоштани гуногунрангии зистмуҳитии Қатар ва талошҳои Бӯстони қуръонӣ дар риштаҳои ҳифзи манобеи наботӣ ба маърази тамошо гузошта шуд.
Бӯстони набототи қуръонии Қатар дар канори ин намоишгоҳ як семинари илмӣ таҳти унвони «Нақши боғҳои ботаникӣ дар ҳифзи гуногунрангии зистӣ» баргузор кард, ки дар он шуморе аз аъзои ҳайати илмӣ, муҳаққиқон ва донишҷӯён ширкат намуданд.
Дар ин семинар ба аҳаммияти ҳамкориҳои пажӯҳишӣ дар заминаи муҳофизати гиёҳҳо ва боло бурдани огоҳии ҷомеа аз арзиши зистмуҳитӣ ва динии наботот пардохта шуд.
Фотима Солеҳ ал-Халифӣ, мудири Бӯстони қуръонии Қатар, дар ин замина гуфт: ҳузур дар ин намоишгоҳ дар ростои талошҳои бӯстон барои тақвияти ҳамкорӣ бо марказҳои академӣ ва пажӯҳишии минтақавӣ ва байналмилалӣ анҷом шуд ва табодули таҷрибаҳо дар заминаи ҳифзи мероси наботот анҷом гирифт.
Ёдовар мешавем, Бӯстони қуръонӣ, ки бахше аз Донишгоҳи Ҳамад ибни Халифа ва вобаста ба Бунёди таълим, улуми инсонӣ ва тавсеаи ҷомеаи Қатар аст, нахустин боғи аз ин навъ дар Қатар ва дувумин боғи ботаникӣ дар Ховари Миёна ба шумор меравад, ки муваффақ ба дарёфти унвони «бӯстони пешгом» дар заминаи ҳифзи манобеи наботот шудааст.
Ин бӯстон бо ҳузур дар чорабиниҳо ва намоишгоҳҳои байналмилалӣ мекӯшад, то назари оянданигар ва аҳдофи исломии худро дар заминаи ҳифзи муҳити зист ва гиёҳҳо муаррифӣ намояд ва огоҳиро аз аҳаммияти онҳо ҳамчун рукни муҳими идомаи ҳаёт дар сайёра боло барад.
