Таъкиди Маҷмаъи байналмилалии фиқҳи исломӣ бар таваҷҷуҳ ба ниёзҳои рӯз дар истифтоҳо
Ба гузориши ИКНА ба нақл аз пойгоҳи иттилоърасонии Маҷмаъи байналмилалии фиқҳи исломӣ, Ҳусайн Иброҳим Тоҳо, дабири кулли Созмони Ҳамкории Исломӣ, дар ҷаласаи ифтитоҳияи Давраи 26-уми иҷлоси Маҷмаъи фиқҳи исломӣ, ки дар Доҳа, пойтахти Қатар баргузор шуд, аз талошҳои ин маҷмаъ дар табйин ва равшангарии уммати Исломӣ ва низ нашри арзишҳои таҳаммулгарои Ислом дар ҷаҳоне пур аз тағйир ва таҳаввул қадрдонӣ кард.
Вай бар аҳамияти фиқҳи исломӣ дар ҳидояти уммат ва ҳаллу фасли мушкилоти он дар бахшҳои мухталифи зиндагӣ таъкид кард.
Иброҳим Тоҳо афзуд: баҳс перомуни нақши уламо дар чунин конфронсҳо муҳим аст, зеро шӯрои фиқҳӣ дар таҳияи фатвоҳое, ки бо ҳифзи арзишҳои исломӣ ҳамсони замон бошанд, нақши муҳим дорад.
Рӯзи якшанбе бо ҳузури маҷмуае аз уламо ва донишмандони ҷаҳони Ислом ва бо нозироти Шайх Муҳаммад бин Абдураҳмон Оли Сонӣ, нахуствазир ва вазири умури хориҷии Қатар дар шаҳри Доҳа оғоз гардид.
Ғоним бин Шоҳин, вазири авқоф ва умури исломии Қатар дар маросими ифтитоҳияи ин иҷлос, ки то рӯзи панҷшанбе (18-уми ордибиҳишт) идома хоҳад ёфт, бо истиқбол аз уламо ва коршиносони ширкаткунанда дар ин рӯйдод, бар аҳамияти мизбонии давлати Қатар аз ин руйдоди илмии ҷаҳонӣ дар ростои таҳкими нақши фиқҳ ва андешаи исломӣ дар ҳаллу фасли масоили муосир таъкид кард.
Шайх Солеҳ бин Абдуллоҳ бин Ҳумайд, имом ва хатиби масҷиди Ҳаром ва раиси Маҷмаъи фиқҳи исломӣ низ перомуни аҳамияти мавзӯъоти мавриди баҳс дар ин давраи иҷлос сухан гуфт ва таъкид кард, ки ин мавзӯъҳо, масоили муҳиме ҳастанд, ки ба иҷтиҳоди ҷамъӣ ниёз доранд.
Дар идома, Қутб Мустафо Сано, дабири кулли Маҷмаъи фиқҳи исломӣ бо таъкид бар аҳамияти мавзӯъоти мавриди баҳс, онҳоро баргирифта аз воқеият донист, ки таъсири бузурге дар зиндагии инфиродӣ ва иҷтимоӣ доранд. Аз муҳимтарин мавзӯъҳо метавон ишора кард ба:
- зеҳни сунъӣ ва аҳкому зобитаи он; қоидаи истисҳоб ва корбурдҳои он дар масоил ва рӯйдодҳои муосир; бозиҳои электронӣ ва аҳкоми фиқҳии вобаста ба онҳо; таъсири бемориҳои равонӣ бар аҳлият дар шариати исломӣ; ва масоили навпайдои саноати молии исломӣ.
Вай ҳамчунин изҳор дошт, ки ин давраи иҷлос аз лиҳози шумори таҳқиқоти илмӣ (187 таҳқиқ) ва шумори ширкаткунандагон бузургтарин иҷлос то ба имрӯз ба шумор меравад.
Қобили зикр аст, ки шӯрои маҷмаъ таҳқиқоти ирсолиро дар тӯли панҷ рӯз бо ҳузури 230 олиму коршинос аз беш аз 60 кишвари ҷаҳон мавриди баррасӣ қарор хоҳад дод.
Ҳуҷҷатул-ислом вал-муслимин Ҳамид Шаҳриёрӣ, дабири кулли Маҷмаъи тақриби мазоҳиби исломӣ ва Оятуллоҳ Аҳмад Мубаллиғӣ, узви Маҷлиси хабаргону раҳбарӣ аз ҷониби Ҷумҳурии Исломии Эрон дар ин иҷлос ширкат доранд.
Маҷмаъи байналмилалии фиқҳи исломӣ тасмимот ва тавсияҳое содир хоҳад кард, ки ба раҳнамоии сиёсатгузорон, раҳбарон ва андешамандон кӯмак хоҳад кард ва нақши иҷтиҳоди ниҳодии ҷамъиро дар пардохтани масоили муосир дар чаҳорчӯби рӯйкарди илмии мунтазам, ки аслият ва навовариро дар бар мегирад, таҳким хоҳад бахшид.
Дар тӯли панҷ рӯз, ин иҷлос маҷмӯаи васеъи масоили муосири фиқҳӣ, фикрӣ, пизишкӣ, иҷтимоӣ ва иқтисодиро, ки мавриди таваҷҷуҳи кишварҳои узви Созмони Ҳамкории Исломӣ ва ҷомеаҳои мусулмон дар саросари ҷаҳон ҳастанд, мавриди баҳсу баррасӣ қарор хоҳад дод.
