Паёми таслияти Шайх Аҳмад Нуъайнаъ ба муносибати даргузашти фарзанди Мустафо Исмоил
Ба гузориши ИКНА ба нақл аз пойгоҳи хабарии «Ал-Балад», Аҳмад Аҳмад Нуъайнаъ, қории барҷастаи мисрӣ дар мотами муҳандис Отиф Мустафо Исмоил гуфт:
«Бо ғаму андӯҳи амиқ ва қалбе, ки ба ирода ва тақдири илоҳӣ имон дорад, даргузашти бародари азизу дӯсти гиромии хеш – муҳандис Отиф Мустафо Исмоил, фарзанди устоди арҷмандам, шайх Мустафо Исмоил (р), ки дирӯз шом дори фониро падруд гуфт, ба уммати Ислом ва дӯстдорони Қуръони Карим ва тиловати он таслият арз мекунам. Ӯ аз худаш номи нек ва ҷойгоҳи дӯстдоштанӣ дар дили ҳамаи онҳое, ки ӯро мешинохтанд ва бо ӯ наздик буданд, боқӣ гузошт».
Нуъайнаъ афзуд, ки муҳандис Отиф марде ором, андешаманд, сахт вобаста ба ёди падараш ва алоқаманд ба ҳифз ва зинда нигоҳ доштани мероси бузурги ӯ буд ва ҳамеша бо ифтихор ва қадрдонӣ аз он сухан мегуфт. Ӯ ошиқи аҳли Қуръон буд, ба қориён меҳр меварзид ва аз ҳамнишинӣ бо онҳо лаззат мебурд.
Ӯ гуфт: «Ман солҳои зиёд бо ӯ зиндагӣ кардам ва ӯ барои ман бародари саховатманд, дӯсти воқеӣ ва ҳамроҳи меҳрубон буд. Мо дар бисёре аз маросимҳо ва барномаҳо бо ҳам будем. Дар ҳар мулоқот, дар ӯ наҷобат, вафодорӣ, хоксорӣ ва фидокорӣ барои зинда нигоҳ доштани номи падараш бо муҳаббат ва ифтихорро медидам. Бо даргузашти ӯ ман як бародар, як дӯст ва як азизро аз даст додам. Ҷомеаи қуръонӣ як чеҳраи покро дар росткорӣ ва вафодорӣ ба мактаби аслии тиловати мисрӣ аз даст дод».
Нуъайнаъ дар идома гуфт: «Бо вуҷуди дарде, ки аз ин фоҷиа эҳсос мекунам, натавонистам дар маросими ҷанозаи ӯ ширкат кунам ва дар ин лаҳзаи дарднок дар канори хонаводааш бошам. Ман ҳоло дар сафари аз қабл барномарезишудаи қуръонӣ дар Бритониё ҳастам. Агар дар Миср мебудам, нахустин нафаре мебудам, ки дар ин маросим ҳузур меёфтам ва дар канори хонаводаи мӯҳтарами ӯ қарор мегирифтам».
Ӯ дар поён гуфт: «Таслияти самимии худро ба хонаводаи мӯҳтарами ӯ ва ҳамаи аъзои хонадони шайх Мустафо Исмоил ва дӯстдорони ӯ дар Миср ва ҷаҳони Ислом изҳор медорам. Аз Худованди Мутаол хоҳонам, ки муҳандис Отифро мавриди раҳмати хеш қарор диҳад, ба ӯ мақоми баланд дар биҳишт ато кунад ва ба хонавода, наздикон ва дӯстдоронаш сабру таҳаммул ато фармояд».
Иннолиллоҳ ва инно илайҳи роҷиъун
Ёдовар мешавем, Отиф Мустафо Исмоил, фарзанди бузурги шайх Мустафо Исмоил буд, ки рӯзи душанбе (5 хурдод) дори фониро падруд гуфт. Ӯ бо лақабҳои «гардоварандаи мероси падар» ва «бузургтарин шунавандаи тиловатҳои шайх Мустафо Исмоил» шинохта мешуд. Маросими ҷанозаи ӯ дирӯз дар зодгоҳаш — деҳаи Мит Ғазол баргузор шуд ва дар оромгоҳи хонаводагии худ дар ҳамин деҳа ба хок супурда шуд.
Усома Алазҳарӣ, вазири авқофи Миср низ бо ирсоли паёме даргузашти Отиф Мустафо Исмоилро таслият гуфт ва изҳор дошт: «Бо қалби имондор ба қазо ва қадари илоҳӣ, даргузашти фарзанди яке аз бузургтарин пешгомони тиловати Қуръон ва соҳиби ҳалқуми тиллоии тиловат дар Мисрро таслият мегӯям».
