Тақдир намудани гурӯҳи наве аз ҳофизони Қуръон дар Қирғизистон
Ба гузориши ИКНА ба нақл аз хабаргузории «Сабқ», Маркази «Нур Ал-Қуръон» дар доираи барномаҳои таълимии худ маросими хатми соли таҳсили 2024–2025-ро дар шаҳри Бишкек баргузор кард. Дар ин маросим сенздаҳумин гурӯҳи писарон ва панҷумин гурӯҳи духтарон хатм карданд.
Дар ҳузури намояндагони муассисаҳои мазҳабӣ ва таълимӣ, 12 писар ва 18 духтари ҳофизи Қуръон бо анҷоми барномаи таълимии худ соҳиби шаҳодатнома гардиданд ва бо эҳдои туҳфаҳо қадрдонӣ шуданд.
Бо хатми ин гурӯҳ, шумораи умумии ҳофизони Қуръон дар Маркази «Нур Ал-Қуръон» ба 329 нафар — аз ҷумла духтарон ва писарон — расид. Ҳамчунин, 223 нафар аз Қуръономӯзони духтару писар ҳамакнун дар ин марказ таҳсили худро идома медиҳанд.
Дар ҷараёни маросим тиловатҳои қуръонӣ садо дод ва намояндагони марказ, Иттиҳодияи ҷаҳонии ҷавонони мусулмон ва дигар ниҳодҳои исломӣ суханронӣ карда, бар зарурати ҳимоят аз фаъолиятҳои таълимии қуръонӣ таъкид намуданд.
Аз дигар бахшҳои ҷолиби маросим, намоиши филми кӯтоҳ бо номи «Нуре, ки хомӯш намешавад» буд, ки аз сӯи Қуръономӯзони марказ таҳия шудааст. Ин филм ба фаъолиятҳои қуръонӣ ва масъулияти қуръономӯзон дар рӯбарӯӣ бо чолишҳо мепардозад.
Бахши поёнии маросимро эҳдо ва тақдими ифтихорномаҳо ва иҷозатномаҳои қуръонӣ ба ҳофизон, ҳамчунин акси ёдгорӣ ташкил дод.
