Намоиши Қуръони мансуб ба ҳазрати Имом Алӣ (а) дар ҳарами Алӣ (а) + навор
Ба гузориши ИКНА ба нақл аз ал-Наҳор, ин намоишгоҳ рӯзи сешанбе 11-уми июн дар чорчӯби барномаҳои Ҳафтаи Ғадир дар ҳарами муқаддаси Алӣ (а) баргузор гардид ва дар он Қуръонҳои хаттии нодир аз асри аввал то асри чордаҳуми ҳиҷрӣ дар маърази тамошои умум қарор гирифтанд.
Омӯзиши ҷараёни таҳаввули хаттотии арабӣ ва китобати Қуръон дар тӯли давраҳои гуногуни исломӣ, аз ҳадафҳои аслии баргузории ин намоишгоҳ эълом шудааст.
Аммор Мошоаллоҳ, масъули воҳиди хазинадории остонаи Алӣ (а) дар ин бора гуфт: воҳиди хазинадорӣ ва осорхонаи ҳарами муқаддас дар чорчӯби барномаҳои Ҳафтаи Ғадир ин намоишгоҳро баргузор кардааст ва гаронбаҳотарин ва нодиртарин нусхаҳои хаттии Қуръонро ба маъраз гузоштааст.
Ӯ илова кард: ин намоишгоҳ беш аз 50 нусхаи нодири Қуръон аз асри аввал то чордаҳуми ҳиҷрӣ-ро ба намоиш гузошта ва ҷаҳони хаттотии исломӣ ва таҳаввули он аз асри аввал то имрӯзро ба хубӣ нишон медиҳад.
Аммор Машоаллоҳ таъкид кард: Қуръонҳои ба намоишгузошташуда, намунаҳои равшани муҳимтарин навъи хаттотии исломӣ мебошанд, ки аз сӯи хаттотони барҷастаи Қуръон чун Яқути Ҳамавӣ ва Суҳравардӣ навишта шудаанд. Ҳамчунин дар ин намоишгоҳ маҷмӯае аз нусхаҳои хаттии Қуръон, ки ба дасти занони хаттот китобат шудаанд, низ ба намоиш гузошта шудаанд.
Ӯ гуфт: ин нусхаҳои Қуръонӣ ба далели қадимият ва нақши таъсиргузори таърихии худ бар мероси ҷаҳони Араб ва Ислом, аз нодиртарин ва муҳимтарин осор дар ҷаҳон маҳсуб мешаванд.
Аҳмад Наҷафӣ, аз муҳаққиқони воҳиди хазинадории ҳарами Алӣ (а) низ дар ин замина гуфт: ин рӯйдод бо намоишгоҳи аксҳо дар бораи таҳаввули китобати Қуръони Карим ва чанд ваҷҳи вижагии он, аз ҷумла набудани нуқта ва илова шудани аломатҳои ҳаракат (аъроб), ташдид, мадд, сукун ва ғайра, ҳамроҳ шудааст.
Ӯ изҳор дошт: дар ин намоишгоҳ, нусхае аз Қуръони мансуб ба ҳазрати Амири Мӯъминон Алӣ (а) низ ба маърази намоиш гузошта шудааст, ки гуфта мешавад дар солҳои 40-и баъд аз беъсат, ба хатти Куфӣ китобат шудааст.
Наҷафӣ дар поён таъкид кард: баргузории ин намоишгоҳ нишонаи таваҷҷуҳи остонаи муқаддаси ҳазрати Алӣ (а) ба ҳифзи мерос, ба хусус мероси Қуръонӣ, мебошад.
Остонаи муқаддаси ҳазрати Алӣ (а) чордаҳумин Ҳафтаи байналмилалии иди аъзами Илоҳӣ — иди Ғадир Хумро баргузор мекунад, ки фарогири як силсила барномаҳо ва фаъолиятҳо мебошад.
Яке аз вижагиҳои барҷастаи ин ҳафта, иштироки густурда дар таҷлил аз иди Ғадир ба ҳадафи таблиғ ва огоҳии динист, ки ба ҳамин муносибат, беш аз 700 парчами Ғадир дар Ироқ, Наҷаф ва саросари ҷаҳон афрохта шудаанд.
Парчами Ғадир ҳамчунин дар беш аз 40 кишвар дар 5 қора, аз ҷумла кишварҳои Урупо, 5 иёлат дар Амрико ва беш аз 3 парчам дар Эрон, бо ҳамоҳангӣ ва ҳимояти остонаи муқаддаси ҳазрати Алӣ (а) барафрошта шудааст.
