Паймони Иброҳим: заъифсозии динҳо ва ҳуқуқи миллии фаластиниён

Трамп на шахси мазҳабист, на дорои андешаҳои идеологӣ ва на як сиёсатмадори стратегист. Ӯ як тоҷири ҳақиқист. Барои ӯ дин аҳамияте надорад — тамоми таваҷҷӯҳ ва андешаи ӯ фоида аст; фоидае, ки тавассути зӯргӯӣ, таҷовуз ва таҳдид ба даст оварда мешавад. Аммо чунин рафтор дар ҳамаи динҳои илоҳӣ ва ҳатто дар фалсафаи секулор рад шудааст.

«Муомилаи Иброҳим», ки бо номи Паймони Иброҳим машҳур аст, як силсила мувофиқатномаҳои расмии оддӣ кардани равобит миёни Исроил ва чанд кишвари арабӣ мебошад, ки бо пуштибонии ҳукумати Доналд Трамп, раисиҷумҳури собиқи ИМА, амалӣ гашт. Ин созишномаҳо байни Исроил ва кишварҳои Аморати Муттаҳидаи Араб, Баҳрайн, Судон ва Марокаш баста шудаанд.

Михаил Ауоз, таҳлилгари лубнонӣ, дар матлабе барои ИҚНО мегӯяд:
Дар даврони аввалини раёсати ҷумҳурӣ, Трамп тарҳи “Созиши Қарн”-ро пешниҳод кард, ки бо нокомии шадид рӯбарӯ шуд. Дар давраи баъдиаш, ӯ лоиҳаи “Ғазза — Ривейраи Шарқи Наздик”-ро матраҳ кард, ки онро мардум дар ҳолати қатли ом, ишғол ва фидокориҳои ҳаррӯза рад карданд.

Акнун ӯ кӯшиш дорад бо номи “дин ё мазҳаби Иброҳимӣ” (яъне Иброҳимизм) тарҳи дигареро пуштибонӣ кунад. Аммо ин тарҳ на динист, на маънавӣ — балки як кӯшиши сохтани дини мувофиқ бо тиҷорату манфиатҳои шахсӣ аст. Ӯ мехоҳад арзишҳои динӣ, аҳком, мамнуъиятҳо ва муқаррароти диниро дубора тарҳрезӣ кунад, то бо ахлоқ ва тафаккури тиҷоратии худ мутобиқ созад.

Ин дар ҳолест, ки динҳои илоҳӣ ва арзишҳои онҳо чун решаҳои амиқ дар фарҳанг, хотира ва одатҳои мардум ҷой гирифтаанд ва намешавад онҳоро ҳамчун мол барои муомила истифода бурд.

Ҳадафҳои асосии Паймони Иброҳим:

1. Таъғир ва заъиф кардани динҳо, то онҳоро мувофиқи манфиатҳои Трамп ва гурӯҳҳои золиме, ки ба ҷаҳон ҳукм меронанд, созгор кунанд.

2. Пайдо кардани заминаи ақидатӣ ва идеологӣ барои лоиҳаҳое, ки ҳуқуқҳои миллӣ, нажодӣ, инсонӣ ва мазҳабии фаластиниёнро нобуд месозанд.

Моҳияти таҳрифшудаи “Иброҳимизм”:

Ин тарҳ аз реша таҳрифшуда ва сохтакорӣ шудааст. Он бо нодида гирифтани 10 фармони дини масеҳӣ, роҳу равиши ҳазрати Иброҳим (а) ва канорагирӣ аз аҳкоми илоҳӣ, заминаи мазҳабӣ ва фикриро барои нобудсозии ормонҳои фаластинӣ фароҳам мекунад.

Ҳадаф — аввал шикастани имону эътиқод ва баъд нобуд кардани ҷаҳони воқеии дифоъ аз Фаластин аст.

Паймони Иброҳим ё “Иброҳимизми Трамп” ҳеҷ гоҳ ба ҳадафҳои худ нахоҳад расид. Он наметавонад дини ҳақиқиро таҳриф кунад ва арзишҳои асили онро нобуд созад. Чунин тарҳи сохтакорӣ на маънавият дорад ва на дастгирии мардумро хоҳад ёфт.