Китобхонаи Масҷидуннабӣ (с): ганҷинаи рақамӣ ва муҳофизи Қуръонҳои хаттӣ + видео
Ба гузориши ИҚНО, ба нақл аз сомонаи sabq.org, китобхонаи Масҷидуннабӣ (с) яке аз муҳимтарин ва барҷастатарин марказҳои илмӣ ва маърифатӣ дар ҷаҳони Ислом ба ҳисоб меравад. Ин китобхона бо истифода аз навтарин технологияҳои таҳқиқоти рақамӣ ва коркарди илмӣ, ганҷинаи пурарзиш аз китобҳои нодир, манобеи илмӣ ва нусхаҳои хаттии камёбро бо замонавӣ кардани усулҳои хизматрасонӣ ба ҳам пайванд додааст.
Ин китобхонаи рақамии Масҷидуннабӣ як китобхонаи оммавӣ аст, ки дар назди Масҷиди Набавӣ дар шаҳри Мадина фаъолият дорад. Он соли 1352 ҳиҷрии қамарӣ (баробар ба 1933 мелодӣ) бо пешниҳоди Убайд Маданӣ, роҳбари вақти авқофи Мадина таъсис ёфтааст. Ҳатто қабл аз таъсиси расмии он, дар Равзаи Шариф китобҳое ҳифз мешуданд, ки таърихи нашри баъзе аз онҳо хеле қадимтар аз таърихи ифтитоҳи китобхона мебошад.
Китобхона бахшҳои зиёд ва мукаммал дорад, аз ҷумла:
-
Салонҳои хониш барои мардон, занон ва кӯдакон
-
Бахши нусхаҳои хаттӣ, ки дар он китобҳои дастнавис ва нодир нигоҳдорӣ мешаванд
-
Китобхонаи садоӣ (аудио) — барои сабти дарсҳо, хутбаҳо ва намозҳое, ки дар Масҷиди Набавӣ хонда мешаванд
-
Бахши техникии махсус — барои таъмиру барқарорсозии китобҳо ва нусхаҳои хаттӣ
-
Шуъбаи каталогсозӣ, гурӯҳбандӣ ва ҷамъоварии китобҳо, инчунин бойгонӣ ва нигаҳдории маҷаллаҳои даврӣ
-
Бахши китобҳои нодир ва камёб, ки дар он китобҳое бо таърихи қадим, ороишҳои зебо ва шакли хос нигоҳ дошта мешаванд.
Дар ин китобхона бахши рақамӣ низ мавҷуд аст, ки дорои компютерҳои замонавӣ мебошад. Онҳо ба шабакаи Wi-Fi-и Масҷид ва интернет пайваст шудаанд. Меҳмонон метавонанд дар он китобҳо ва мавзуъҳои мухталифро аз китобхонаи Масҷидуннабӣ, барномаи китобхонаи ҷомеъ, китобхонаи исломии бузург ва сомонаҳои исломӣ ҷустуҷӯ кунанд.
Ин китобхона беш аз 182 ҳазор китоб дар 71 гурӯҳи илмӣ ба зиёда аз 23 забони байналмилалӣ дорад ва ба як маркази муҳими таҳқиқотӣ барои муҳаққиқон ва меҳмонони тамоми миллатҳо табдил ёфтааст.
Он инчунин дорои беш аз 143 ҳазор китоб ва 43 миллион саҳифа дар шакли рақамӣ мебошад, ки ин нишон медиҳад то чӣ андоза миқдори маводи илмӣ дар ин китобхона бузург аст.
Китобхона 70 компютери махсус барои таҳқиқоти рақамиро дар ихтиёри корбарон қарор додааст.
Ин китобхона ҳатто қабл аз сӯхторе, ки дар 13-уми моҳи Рамазон, соли 886 ҳиҷрии қамарӣ дар Масҷид ба амал омад, фаъолият мекард. Дар натиҷаи он сӯхтор, баъзе китобҳо аз байн рафтанд, аммо то имрӯз нусхаҳои дастнависи хеле арзишманд ва нодир дар ин ҷо нигоҳдорӣ мешаванд.
Дарҳои китобхона 24 соат бозанд, то ҳар шахсе, ки дар ҷустуҷӯи дониш ва маърифат аст, битавонад бидуни мамониат аз он истифода кунад.
Муҳимтарин бахши китобхона бахши китобҳои зиндагиномаи Паёмбари Ислом (с) мебошад, ки шумораи онҳо ба беш аз 4 ҳазору 500 китоб мерасад.
Инчунин як толори махсуси забонҳои мухталиф вуҷуд дорад, ки дорои 770 китоб ба забони урду ва дар маҷмӯъ 2500 китоб ба забонҳои мухталиф мебошад.
Бахши махсуси нусхаҳои хаттии исломӣ низ дар китобхона мавҷуд аст, ки дар он Қуръонҳои дастнавис ва асарҳои нодири исломӣ нигаҳдорӣ мешаванд. Ин бахш нишондиҳандаи таваҷҷуҳи хосси мусалмонон ба китобати Қуръон ва нигоҳдории мероси хаттии исломӣ мебошад.
