Чопи дубораи китоби «Паёми Қуръон» дар Қатар
Ба гузориши ИҚНО ба нақл аз сомонаи qna.org, ин китоб ба забони арабӣ таҳти унвони «رسالة القرآن» бо тарҷумаи «Паёми Қуръон» ва бо шиори:
«إِنَّ هَذَا الْقُرْآنَ يَهْدِي لِلَّتِي هِيَ أَقْوَمُ»
(Ба дурустӣ, ки ин Қуръон ба дурусттарин роҳ ҳидоят мекунад)
дар доираи силсилаи барномаҳои фарҳангии Раёсати пажӯҳишҳои исломии Вазорати авқофи Қатар нашр шудааст.
Вазорати авқоф дар як баёния гуфт, ки чопи дубораи ин китоб дар посух ба дархости хонандагон ва донишмандон анҷом шудааст, зеро тамоми нусхаҳои чопи нахустин — ки соли 2010 ба муносибати анҷоми мусҳафи Қатар нашр шуда буд — фурӯхта шуда буданд.
Шайх Аҳмад ибни Муҳаммад ибни Ғоним Оли Сонӣ, раиси Раёсати пажӯҳишҳо ва омӯзишҳои исломии Қатар, дар ин робита гуфт:
"Ин китоб хулосаи осор ва андешаҳои як гурӯҳ аз нависандагону муҳаққиқони кишварҳои арабиву исломиро дарбар мегирад. Мавзӯъҳои муҳим аз ҷумла: нақши марказии Қуръон дар пешрафти тамаддуни умат, рӯйкарди Қуръон ба ислоҳи дидгоҳҳои динӣ ва ҷаҳонӣ будани каломи ваҳй — бо хитоб ба тамоми башарият — дар ин асар баррасӣ шудаанд."
Ӯ афзуд, ин китоб нақши Қуръонро дар рушди тафаккур ва андешаронӣ шарҳ медиҳад ва хонандаро ба таҳқиқ дар илми кайҳон ҳамчун равзанаи пешрафт ташвиқ мекунад.
Ал Сонӣ инчунин гуфт:
"Дар «Паёми Қуръон» асосҳои як тамаддуни солим ва омилҳои суқути он, бар пояи дидгоҳи Қуръонӣ, ки ба имон, арзишҳои ахлоқӣ ва пешрафти моддӣ такя дорад, тасвир ёфтааст."
Вай таъкид кард, ки чопи дубораи ин китоб нишонаи пойбандии Вазорати авқоф ба ғанӣсозии муҳити фарҳангӣ бо манобеъи илмӣ аст ва барои хонандагон имкони дарки амиқтаре аз паёми Қуръон ва нақши тамаддунсозии он фароҳам месозад.
4295238
