Сабти нахустин тиловати мурраттал; нуқтаи гардиш дар хидмат ба Қуръон

Вазорати авқофи Миср ба муносибати солгарди анҷоми нахустин сабти тиловати пурраи Қуръони Карим, ки 23 июли соли 1961 анҷом ёфта буд, эълон кард, ки ин тарҳ нуқтаи муҳими таърихӣ дар роҳи хидмат ба Қуръон ва густариши он дар саросари ҷаҳон ба шумор меравад.

Бино ба гузориши икно бо истинод ба «Масравӣ», Вазорати авқофи Миср дар баёнияе изҳор дошт, ки ин тарҳ он замон таҳти назорати Вазорати авқоф ва тавассути Шӯрои олии корҳои исломии Миср амалӣ гардид ва бо ҳамкории гурӯҳе аз олимону устодони барҷастаи илми қироат, барои омӯзиш ва нашри Китоби Худо уфуқҳои навро боз намуд.

Ин вазорат таъкид кард, ки ин дастовард самараи талошҳои Шайх Маҳмуд Шалтут, шайхи вақти Ал-Азҳар ва Лабиб ас-Саъид, пешниҳодкунандаи идеяи ҷамъоварии овозии Қуръон, дар замони вазири пешини авқофи Миср Аҳмад Абдуллоҳ Туайма мебошад.

Барои сабти ин тиловати мурраттал тибқи ривояти Ҳафс аз Осим, Шайх Маҳмуд Халил ал-Ҳусарӣ таҳти назорати як кумитаи махсуси илмӣ интихоб гардид.

Дар идомаи баёния омадааст, ки ин сабт ба манбаи асосии овозии тиловати Қуръон табдил ёфта, дар ҳифзи қироати саҳеҳ ва пешгирӣ аз ҳар гуна таҳриф нақши муҳим бозидааст. Ҳамчунин, ин иқдом пешсафии Мисрро дар хидмат ба Қуръон, пеш аз интишори сабтҳои дигари қориёни машҳури мисрӣ дар ҷаҳон, нишон медиҳад.

Дар поёни баёния, Вазорати авқофи Миср бар идомаи рисолати худ дар хидмат ба Қуръон тавассути ташаббусҳо ва тарҳҳои гуногун, аз ҷумла озмуни телевизионии «Давлати тиловат», рушди марказҳои омӯзиши қироат, тарбияи ҳофизони Қуръон ва баргузории мусобиқаҳои қуръонӣ бо ҳадафи таҳкими ҷойгоҳи қуръонии Миср таъкид кардааст.

Шайх Маҳмуд Халил ал-Ҳусарӣ, қории машҳур ва бузурги мисрӣ, аввалин қорӣ буд, ки Қуръони Каримро бо услуби тартил тиловат намуда, онро бар рӯйи навори кассет сабт кард. Ҳамчунин, ӯ ягона қорӣ буд, ки тиловати дилнишини ӯ дар Кохи Сафед низ танинандоз гардидааст.

4366023