Дабири кулли Созмони Ҳамкории Исломӣ аз қарори Фаронса дар бораи Фаластин истиқбол кард
Ба гузориши Иқно ба нақл аз сомонаи Созмони Ҳамкории Исломӣ, Тоҳа гуфт, ин иқдоми Фаронса як қадами муҳими мувофиқ бо қонунҳои байналмилалӣ ва идомаи мавқеъгирӣ ва кӯшишҳои ин кишвар барои ҳимоят аз ҳуқуқи мардуми Фаластин, аз ҷумла ҳаққи муайян кардани сарнавишти худ ва таъсиси давлати мустақил бо пойтахти Қудси Шарқӣ мебошад.
Вай таъкид намуд, ки чунин иқдом ба тақвияти мақоми сиёсӣ ва ҳуқуқии Фаластин дар саҳнаи байналмилалӣ кумак мекунад. Ҳамзамон аз ҳамаи кишварҳое, ки то ҳол давлати Фаластинро ба расмият нашинохтаанд, даъват кард, ки пешқадам бошанд ва аз узвияти комили Фаластин дар Созмони Милали Муттаҳид пуштибонӣ намоянд.
Дабири кулл инчунин бар аҳамияти ширкат дар як конфронси байналмилалӣ дар сатҳи воломақом барои ҳалли осоиштаи масъалаи Фаластин, ки ҳафтаи оянда дар қароргоҳи СММ таҳти раҳбарии Арабистони Саудӣ ва Фаронса баргузор мешавад, таъкид кард. Ӯ илова намуд, ки ҷомеаи ҷаҳонӣ бояд барои қабули иқдомҳои амалӣ, ки ба сулҳу субот дар минтақа мувофиқи нақшаи ду давлат, қарорҳои байналмилалӣ ва барномаи сулҳи арабҳо мусоидат мекунад, талош кунад.
Эммануэл Макрон, раисиҷумҳури Фаронса, шаби панҷшанбе гуфт, ки Париж давлати Фаластинро расман ба расмият хоҳад шинохт ва ин тасмимро расман дар Маҷмаи умумии СММ дар моҳи сентябр эълон мекунад.
Ӯ дар шабакаи иҷтимоии "Икс" (пештар Твиттер) навишт:
«Сулҳ имконпазир аст» ва Париж ин тасмимро «бар асоси ӯҳдадории таърихии худ ба сулҳи одилона ва пойдор дар Ховари Миёна» гирифтааст.
Раисиҷумҳури Фаронса ҳамчунин зарурати эълони оташбаси фаврӣ дар Ғазза, озодии тамоми асирони исроилӣ, ва расонидани кӯмакҳои башардӯстона ба мардуми Ғазза-ро таъкид кард.
Илова бар ин, Макрон холис кардани силоҳи Ҳамос-ро низ талаб кард ва гуфт, ки Ғаззаро бояд амн ва аз нав обод кард.
4296300
