Маросими ҷанозаи шаҳидони ҳамлаи террористии Исроил ба Саноа баргузор шуд + филм
Ба гузориши ИҚНО ба нақл аз ал-Масира, даҳҳо ҳазор сокини Яман аз соатҳои барвақти субҳ ба сӯи Майдони ас-Сабъин дар пойтахти кишвар раҳсипор шуданд, то дар маросими расмии ҷанозаи шахсиятҳои давлатӣ, аз ҷумла сарвазир ва чанде аз вазироне, ки дар ҳамлаи ҳавоии Исроил шаҳид шуданд, ширкат кунанд.
Намози ҷаноза барои шаҳидони “Фатҳи ваъдашуда” ва қурбониёни ҳамлаи террористии режими саҳюнистӣ дар масҷиди “аш-Шаъб” дар Саноа барпо гардид.
Муҳаммад Мфтаҳ, сарпарасти ҳукумати «Таъғир ва Сохтмон»-и Яман, дар ин маросим гуфт:
«Мо ба мавқеи шарафмандонае истодаем ва ҳаргиз аз пуштибонӣ аз Ғазза пушаймон намешавем. Имрӯз Яман дар канори ҳақ қарор дорад ва мо аз ин ифтихор мекунем, ҳарчанд эҳсос мекунем, ки ҳанӯз ҳам ба қадри кофӣ иҷро накардаем.»
Ӯ илова кард:
«Мо ба як ҷанги бузургу таъсиргузор ворид шудем, ки на танҳо ҷанги низомист, балки ҷанги иқтисодӣ низ ҳаст. Душман ба ҳар чизе, ки метавонист, ҳамла кард.»
Сарвазири муваққатии Яман таъкид кард:
«Душман ба бандарҳои Яман ҳамла кард, то кишварро дар муҳосира қарор диҳад, аммо ба мақсади худ нарасид. Бандарҳо ҳанӯз фаъоланд ва ҳеҷ буҳроне ба вуҷуд наомадааст. Корҳои давлат қатъ нашудааст ва хуни шаҳидон ба мо рӯҳия ва иродаи бештар медиҳад.»
Муҳаммад Мфтаҳ афзуд:
«Вазъият хуб аст ва душман ноком шудааст. Мо аз ҳузури мардум дар ҳамаи саҳнаҳо истиқбол мекунем, зеро ҳамин ҳузур буд, ки душманро ба зону даровард. Он чӣ хоинону муздурон паҳн мекунанд, ягон асос надорад.»
Қабл аз оғози маросими ҷаноза, сарҳанг Яҳё Сариъ, сухангӯи неруҳои мусаллаҳи Яман, дар як изҳорот эълон кард, ки воҳиди мушакии Яман як нафткаши Исроилиро дар Баҳри Сурх ҳадаф қарор додааст.
Ӯ гуфт, ки ин амалиёт бо мушаки баллистикӣ, ба нишони ҳимоят аз Ғазза, анҷом шудааст.
Дар натиҷаи ҳамлаҳои ҳавоии рӯзи панҷшанбе аз сӯи режими ишғолгари саҳюнистӣ ба Саноа, Аҳмад Ғолиб Носир ар-Раҳавӣ, сарвазири ҳукумати «Таъғир ва Сохтмон», ба ҳамроҳии чанде аз вазирон, ба шаҳодат расиданд.
Ҷунбиши Ансоруллоҳ душанбе эълон кард, ки дар ин ҳамлаи ҳавоӣ сарвазир ва 9 вазир, аз ҷумла вазирони адлия, иқтисод, корҳои хориҷӣ ва иттилоот, ба шаҳодат расидаанд.
4302798
