Намоиш додани Қуръони гулдӯзишуда дар шаҳри Риёз
Ба гузориши ИҚНО, ба нақл аз "Оҷил", Муҳаммад Моҳир Ҳозирӣ 12 сол вақти худро ба гулдӯзии оятҳои Қуръон бар рӯи матоъ бахшида, як асари ҷолиб ва инноватсионӣ офаридааст ва ифтихори хаттоти Қуръонро ба худ касб намудааст.
Ҳозирӣ, ки Қуръони гулдӯзишударо дар намоишгоҳи китоб дар Риёз ба маърази тамошо гузоштааст, аз соли 1998 гулдӯзии Қуръонро оғоз карда, то соли 2010, баъди 12 соли заҳмати пайваста, онро ба анҷом расондааст.
Вай тамоми Қуръонро бар матоъ гулдӯзӣ намуда, онро ба қисмҳои 80x60 см ҷудо кардааст.
Ин Қуръони гулдӯзишуда аз 12 ҷилд иборат буда, вазнаш тақрибан 200 кило аст ва мисли як расми зебо, арзиши баланди таваҷҷӯҳ ба Қуръонро баён мекунад.
Ҳозирӣ изҳор дошт:
"Орзу доштам ки кори худро дар Арабистон намоиш диҳам ва имсол ин имконият бароям фароҳам шуд.
Тавонистам дар Намоишгоҳи байналмилалии китоби Риёз 2025, ки аз ҷониби Созмони адабиёт, нашр ва тарҷумаи Арабистон баргузор мешавад, ширкат кунам."
Ин хаттоти суриягӣ дар бораи ҷузъиёти фаъолияти худ дар соҳаи санъати хаттоти арабӣ гуфт:
"Аввал Қуръонро бо даст навиштам, ки дар ҳамин раванд санъати хаттотиро хуб ёд гирифтам. Баъд оятҳоро бар рӯи матоъ гулдӯзӣ кардам."
Ӯ таъкид кард:
"Ман бо ҳамин Қуръон дар бисёр намоишгоҳҳо иштирок кардаам ва аз сӯйи меҳмонон бо истиқбол ва таҳсин рӯ ба рӯ шудаам."
Муҳаммад Моҳир Ҳозирӣ илова кард:
"Ғайр аз Қуръон, ман 40 ҳадиси Паёмбар (с), чанд васияти Луқмони Ҳаким ва бархе дуоҳоро низ бар рӯи матоъ гулдӯзӣ кардаам."
Лозим ба ёдоварист, Намоишгоҳи байналмилалии китоби Риёз 2025 аз рӯзи 2-юми октябр (10-уми меҳр) бо шиори «Риёз мехонад» дар Донишгоҳи Амираи Нура бинти Абдурраҳмон оғоз ёфта, то 11-уми октябр (19-уми меҳр) идома меёбад.
4308835
