Бекор шудани ҳукми зиндон барои касе, ки дар Шветсия ба Қуръон беҳурматӣ кард
Ба гузориши ИҚНО, ба нақл аз вебгоҳи «Ал-Кампус», додгоҳи таҷдиди назар баъди сафед кардани Расмус Палудан — сиёсатмадори ифротии дутабъаи даниягӣ ва шветсӣ — дар як парвандаи нафратпарокании нажодӣ, ҳукми зиндонро барҳам дод.
Дар моҳи ноябри гузашта, додгоҳи шаҳри Молмо ӯро барои баёнҳои таҳқиромез нисбати мусалмонон, арабҳо ва африқоиҳо, ба ду иттиҳоми нафратпароканӣ ва чор моҳ зиндон маҳкум карда буд. Онҳо гуфтанд, ки вай дар ду маврид — вақте ки дар моҳи апрел ва сентябри соли 2022 нусхаҳои Қуръонро оташ зад — нисбати мусалмонон ва дигар гурӯҳҳо беэҳтиромӣ кардааст.
Аммо додгоҳи таҷдиди назар дар минтақаҳои Сконе ва Блинге ҳукм кард, ки рафтори ӯ дар моҳи апрел, ҳамчун интиқоди дини ислом буд, на таҳқири мусалмонон ҳамчун як гурӯҳ, ва бинобар ин ӯ аз ин иттиҳом сафед шуд. Дар ҳукми додгоҳ омадааст:
«Ин суханон ва кирдорҳоро метавон ба осонӣ ҳамчун интиқоди мазҳабӣ маънидод кард, ки таҳрик алайҳи як гурӯҳи нажодӣ ё этникӣ ҳисоб намешавад.»
Бо вуҷуди ин, додгоҳ ӯро барои интиқоди нажодии моҳи сентябр гунаҳгор донист. Ба гуфтаи додгоҳ:
«Дар ин ҳолат, вай изҳороти мушаххасе алайҳи гурӯҳҳои қавмии гуногун карда, ки тибқи қонун, ҷиноят дониста мешавад.»
Баъди ин қарор, ҳукми зиндон ба ҳабси шартӣ ва ҷаримаи молӣ табдил дода шуд.
Палудан бо сабаби мавқеъгириҳои ифротгароёнааш ва баргузор кардани маҷлисҳои Қуръонсӯзӣ дар чанд шаҳри Шветсия, ки то эътирозу ошӯбҳо дар остонаи интихоботи 2022 бурда буданд, шинохта мешавад.
4309213
