Ифтитоҳи студияи «ИСЕСКО» барои хизмат ба ҷаҳони ислом

Созмони омӯзишӣ, илмӣ ва фарҳангии ҷаҳони ислом (ИСЕСКО) студияи муосири тавлиди мундариҷаи расонаиро ба чанд забон дар қароргоҳи худ дар шаҳри Работ, пойтахти Марокаш, ифтитоҳ кард.

Ба гузориши ИҚНО ба нақл аз хабаргузории Саудӣ (ВАС), ин студия бо ҳадафи тақвияти фаъолияти расонаии ИСЕСКО дар кишварҳои узв ва омода кардани ҷавонони фаъол дар соҳаи расона ва тавлиди мундариҷа ифтитоҳ шудааст.
Дар он сабт, таҳия ва пахши мундариҷаи расонаӣ бо таҷҳизоти пешрафта анҷом мегирад.

Солим ибн Муҳаммад ал-Молик, директори кулли ИСЕСКО, гуфт:
«Ин иқдом дар доираи стратегияи нави расонаии созмон амалӣ мегардад; стратегияи мазкур ҳадаф дорад паёми расонаи муосир ва муассире эҷод кунад, ки ба шумораи бештари шаҳрвандони кишварҳои узв бирасад ва ҳамзамон қобилиятҳои расонавии шахсон ва ниҳодҳоро дар шароити тағйироти ҷаҳонӣ ва пешрафти технологияҳои иттилоотӣ тақвият диҳад.»

Ба гуфтаи ӯ, студия хидмат ва барномаҳои худро ба забонҳои арабӣ, фаронсавӣ, англисӣ, испанӣ ва русӣ пешниҳод хоҳад кард.
Он ҳамчун як минбари гуфтугӯ ва дониш амал мекунад, ки дар он олимон, мутафаккирон ва адибон мизбонӣ мешаванд, то роҳ ва осори эҷодии онҳо ба ҷаҳони ислом муаррифӣ гардад.

4314187