Посдошти устод Абдулбосит дар барномаи телевизионии Қуръонии Миср
Ба гузориши ИҚНО ба нақл аз “Қоҳира 24”, дар қисмати нави ин барнома, ки рӯзи шанбе, 1-уми озар пахш шуд, аз хизматҳои барҷаста ва талошҳои пойдори устод Абдулбосит дар густариши мактабҳои тиловати мисрӣ дар ҷаҳони арабӣ ва исломӣ қадршиносӣ гардид.
Маросим бо ҳузури Ясор Абдулбосит, писари устод, баргузор шуд ва ӯ аз ин ки падараш дар барномаи «Давлати тиловат» ба ҳайси яке аз чеҳраҳои мавриди эҳтиром интихоб шудааст, изҳори хушнудӣ ва сипосгузорӣ кард.
Ин дар ҳолест, ки қаблан дар ҳамин барнома бо ёд кардани ному хотираи Шайх Маҳмуд Халил Ҳусарӣ ва Муҳаммад Рифъат, ду қории маъруфи давраи тиллоии тиловати Миср, гузорише дар шабакаҳои маҳвораии Миср пахш шуда буд, ки дар он ба зиндагӣ ва фаъолиятҳои Қуръонии онҳо пардохта мешуд.
Барномаи «Давлати тиловат» бахшида ба бузургтарин озмуни истеъдодёбӣ дар ритил ва қироати Қуръон аст, ки аз шабакаҳои маҳвораии “Ал-Ҳаёҳ”, “CBC”, “Аннос”, “Миср Қуръон Карим” ва платформаи “watch it” пахш мегардад.
Соати пахши барнома — соати 9 шаби ҷумъа ва шанбе ҳар ҳафта эълон шудааст.
Ин барнома бо ҳамкории муштараки Вазорати авқоф ва ширкати хидматҳои расонаии «Алмутаҳҳида» тавлид шудааст ва ҳадафаш шиносоӣ ва муаррифии истеъдодҳо ва соҳибони тиловатҳои барҷаста аз саросари вилоятҳои Миср мебошад.
Арзиши ҷоизаҳои ин мусобиқа се ним миллион фунти мисрӣ аст, ки ҳар яке аз нафарони аввали ду бахш — ритил ва қироат — як миллион фунт мегиранд ва тамоми Қуръон бо садои онҳо сабт шуда, аз шабакаи “Миср Қуръон Карим” пахш хоҳад шуд.
Ҳамчунин, ин ду нафар вазифаи имомати намозҳои ҷамоат дар масҷиди Имом Ҳусайн (а) дар шаҳри Қоҳираро дар моҳи Рамазони оянда ба дӯш хоҳанд гирифт.
Тибқи ин гузориш, марҳилаҳои муқаддамотии мусобиқа бо истиқболи хеле густурда рӯбарӯ шуд ва беш аз 14 ҳазор нафар аз вилоятҳои мухталиф дар ин рӯйдод ширкат карданд.
Ҳайати доварон аз чеҳраҳои баландпояи диниву илмии Миср ва ҷаҳони Ислом иборат аст, аз ҷумла:
— Шайх Ҳасан Абдуннабӣ, муовини Кумитаи бознигарии Қуръони Азҳар
— Тоҳа Абдулваҳҳоб, коршиноси садо ва улуми Қуръонӣ
— Мустафо Ҳаснӣ, даъватгар ва муаллифи мазҳабӣ
— Шайх Тоҳа Нуъмонӣ, қории маъруф
4319057
