Масҷиди «Малик» дар Албания бозгушоӣ мешавад + филм
Ба гузориши ИКНО ба нақл аз «Муслимун ҳавл ал-олам», корҳои таъмир ва бозсозии масҷиди ҷомеи «Малик» (Подшоҳ) дар шаҳри Элбасон, воқеъ дар маркази Албания, ба марҳилаҳои поёнии худ наздик шудааст ва қарор аст ба зудӣ барои намозгузорон ва боздидкунандагон бозгушоӣ гардад. Ин иқдом бо ҳадафи ҳифзи мероси исломӣ бо моҳияти усмонӣ ва боло бурдани ҷойгоҳи фарҳангӣ ва таърихии ин шаҳр анҷом шудааст.
Дар ҳамин замина, шаҳрдори Элбасон ҳамроҳ бо муфтии шаҳр ва намояндагони Ожонси ҳамкорӣ ва ҳамоҳангсозии Туркия (TIKA) аз маҳалли масҷид, ки дар минтақаи қалъаи таърихӣ дар маркази шаҳр воқеъ аст, боздиди саҳроӣ анҷом доданд, то ҷараёни пешрафти корҳои таъмирро баррасӣ намоянд. Онҳо таъйид карданд, ки ин тарҳ дар марҳилаҳои ниҳоии худ қарор дорад ва заминаро барои бозгушоии масҷид дар ояндаи наздик фароҳам месозад.
Ҷойгоҳи масҷиди Малик
Масҷиди Малик яке аз барҷастатарин ёдгориҳои таърихии шаҳри Элбасон ва гувоҳи ҳузури ибтидоии Ислом дар маркази Албания ба шумор меравад. Ин масҷид, ки таърихи бунёди он ба охири асри понздаҳуми мелодӣ бармегардад, ба фармони Султон Боязиди Дувум сохта шуда ва қадимтарин масҷиди шаҳр, ҳамчунин як намунаи барҷастаи меъморӣ вобаста ба давраи калидӣ дар таърихи минтақаи Балкан маҳсуб мешавад.
Ин масҷид дар тӯли қарнҳо ҳамчун як маркази ибодатӣ ва фарҳангии таъсиргузор фаъолият дошта ва саҳми қобили таваҷҷуҳе дар зиндагии маънавӣ ва иҷтимоии сокинони шаҳр ифо кардааст.
Масҷиди Малик дорои як толори намоз барои мардон ва як толори ҷудогона барои занон дар ошёнаи дувум мебошад. Пеш аз даромадгоҳи толори намоз дар ҷониби шимолӣ, роҳраве ҷойгир аст, ки он барои касоне пешбинӣ шудааст, ки ба намози ҷамоат намерасанд ва метавонанд намози худро дар он ҷо ба ҷо оваранд.
Сақфи ин масҷид аз чӯб сохта шуда ва аз қабатҳои гуногун иборат аст ва имкони пазируфтани 600 то 700 намозгузорро дорад.
Ин масҷид дар соли 1913 мелодӣ ба таври комил бозсозӣ шуда ва манораи наве барои он бунёд гардидааст, зеро қаблан аз ҷониби коммунистон ба таври комил вайрон шуда буд.
Бозсозӣ ва сохтмони манораи ин масҷид, бар хилофи бисёре аз масоҷиде, ки хароҷоти сохтмони онҳо тавассути муассисаҳои арабӣ ё туркӣ таъмин мешуд, бо кумакҳои худи мусулмонони шаҳри Элбасон анҷом пазируфтааст. Ин масъала нишондиҳандаи ҷойгоҳи вижаи ин масҷиди таърихӣ дар миёни мусулмонони Элбасон ва майли онҳо ба навсозӣ ва ҳифзи он мебошад.
4330611
