Вокуниши мақомоти баландпояи Покистон ва кишварҳо ба таркиш дар масҷиди шиаиёни Исломобод
Ба гузориши «Икно» ба нақл аз «Араб Нюз», Осиф Алӣ Зардорӣ, раисҷумҳур, ва Шаҳбоз Шариф, нахуствазири Покистон имрӯз, ҷумъа, бо судури баёнияҳои ҷудогона рух додани таркиш дар масҷиди шиаиён дар Покистонро таслият гуфта, хостори фароҳам овардани тамоми кумакҳои тиббии мумкин барои маҷрӯҳон шуданд.
Раисҷумҳури Покистон дар ин хусус изҳор дошт: ҳадаф қарор додани ғайринизомиёни бегуноҳ ҷиноят алайҳи башарият аст. Миллат дар ин рӯзҳои душвор дар канори хонаводаҳои осебдида қарор дорад.
Шаҳбоз Шариф, нахуствазири Покистон, изҳор кард: афроде, ки сабабгори ин ҳодиса шудаанд, бояд шиносоӣ ва муҷозот гарданд.
Аз сӯи дигар, Муҳсин Нақвӣ, вазири корҳои дохилии Покистон низ ин ҳамларо маҳкум кард.
Дар пайи шаҳодат ва маҷрӯҳ шудани садҳо намозгузори покистонӣ дар таркиши террористии имрӯз, ҷумъа, дар масҷиди шиаиёни Исломобод, мақомоти кишварҳои гуногун ва созмонҳои байналмилалӣ низ ин ҳодисаи террористиро маҳкум намуда, ба давлат ва миллати Покистон таслият гуфтанд.
Муҳаммад Яҳё, ҳамоҳангсози муқими Созмони Милали Муттаҳид дар Покистон, таассуф ва таъассури худро аз ҳамла ба масҷиди шиаиён ҳангоми намози ҷумъа дар Исломобод изҳор кард.
Вай ба хонаводаҳои қурбониён таслият гуфта, барои маҷрӯҳон орзуи сиҳатёбии зуд намуд.
Ин мақоми СММ бар зарурати иттиҳоди ҳамагон дар баробари ин хушунати бемаънӣ таъкид кард.
Раёсати ҷумҳури Русия (Кремлин) имрӯз бо интишори баёнияе таркиши террористӣ дар Исломободро, ки ҳангоми намози ҷумъа дар масҷиди ҳазрати Хадиҷа Кубро рух дода, садҳо шаҳид ва маҷрӯҳ бар ҷой гузоштааст, маҳкум намуд.
Раёсати ҷумҳури Русия эълон кард, ки Владимир Путин, раисҷумҳури Русия, ба раисҷумҳур ва нахуствазири Покистон таслияти самимонаи худро иброз дошта, бо хонаводаҳои қурбониён ва миллати Покистон ҳамдардӣ мекунад.
Кремлин бар ҳамбастагӣ бо Покистон дар муқобила бо терроризм таъкид намуд.
Дар ин баёния омадааст, ки ҳамлаи террористӣ дар Исломобод далели нави моҳияти ваҳшиёна ва ғайриинсонии терроризм мебошад.
Инчунин таъкид шудааст, ки Русия бар тақвияти ҳамкориҳо бо Покистон дар заминаи мубориза бо терроризм ва ифротгароӣ дар ҳама шаклҳои он пойфишорӣ мекунад.
Вазири корҳои хориҷии Бритониё низ дар баёнияе бо ибрози ҳамбастагӣ бо Покистон ва маҳкум кардани ҳодисаи террористии имрӯз изҳор дошт, ки Бритониё дар канори Покистон дар мубориза алайҳи терроризм меистад ва аз ҳамаи ҷомеаҳое, ки аз ин хушунати бемаънӣ осеб дидаанд, ҳимоят мекунад.
Дар ин баёния омадааст, ки ин ҳамлаи даҳшатнок, ки имрӯз рух дод, бисёр такондиҳанда аст ва бо хонаводаҳои қурбониён ва ҳамаи осебдидагон изҳори ҳамдардӣ мешавад.
Раёсати ҷумҳури Ироқ ҳамлаи террористии имрӯз, ҷумъаро, ки намозгузоронро дар дохили як масҷид дар Покистон ҳадаф қарор дода, боиси шаҳодат ва маҷрӯҳ шудани бархе аз мардум гардид, маҳкум карда, ин амалро мухолифи ҳамаи арзишҳои инсонӣ донист.
Дафтари расонаии раёсати ҷумҳурӣ дар баёнияи матбуотӣ эълон кард: раёсати ҷумҳури Ироқ амиқтарин таслият ва ҳамдардии худро ба хонаводаҳои шаҳидон иброз дошта, барои маҷрӯҳон орзуи сиҳатёбии зуд мекунад.
Дар ин баёния бар ҳамбастагии комили Ироқ бо давлат ва миллати дӯсти Покистон ва мавқеи қотеъ дар радди ҳама шаклҳои терроризм, хушунат ва ифротгароӣ таъкид шудааст.
Раёсати ҷумҳури Ироқ ҳамчунин хостори «тақвияти ҳамкориҳои байналмилалӣ ва минтақавӣ барои мубориза бо терроризм, таҳкими арзишҳои таҳаммул ва ҳамзистии осоишта ва ҳимоят аз ҳаққи ҳаёт, амният ва озодии эътиқод барои инсонҳо» гардид.
Вазорати корҳои хориҷӣ ва муҳоҷирати Урдун бомбгузории интиҳориро, ки масҷиди шиаиёни Исломободро ҳадаф қарор дода, боиси кушта ва маҷрӯҳ шудани бархе афрод гардид, маҳкум кард.
Сухангӯи расмии ин вазорат, сафир Фуод Маҷолӣ, бар ҳамбастагии комили ин кишвар бо давлат ва мардуми Покистон ва радди ҳар гуна хушунат ва терроризм бо ҳадафи заъиф кардани амният ва субот таъкид намуд.
Вай амиқтарин таслияти худро ба давлат ва мардуми Покистон ва хонаводаҳои қурбониён иброз карда, барои маҷрӯҳон орзуи сиҳатёбии зуд намуд.
Вазорати корҳои хориҷии Қатар низ бо маҳкум кардани таркиши интиҳорӣ дар масҷиди Исломобод бар мавқеи қотеъи давлати Қатар дар муқобили хушунат, терроризм ва амалҳои ҷинояткорона, новобаста аз ангезаҳо ё далелҳои он, таъкид кард.
Ин вазорат ҳамчунин ҳадаф қарор додани маконҳои ибодат ва қатли ғайринизомиёни бегуноҳро комилан рад намуд.
Дар идома, вазорат маротиби таслияти худро ба хонаводаҳои қурбониён ва ба давлату миллати Покистон иброз дошта, барои маҷрӯҳон орзуи сиҳатёбии зуд кард.
Вазорати корҳои хориҷии Ҳинд низ дар баёнияе таркиши интиҳориро дар масҷиди Исломобод, ки садҳо шаҳид ва маҷрӯҳ бар ҷой гузоштааст, ба хонаводаҳои қурбониён таслият гуфта, бо онҳо изҳори ҳамдардӣ кард.
То кунун шаҳодати 31 нафар ва маҷрӯҳ шудани 169 тан дар ин ҳодиса аз сӯи пулиси шаҳри Исломобод, пойтахти Покистон, таъйид шудааст.
Тибқи эълони расонаҳои Покистон, таркиши террористӣ дар масҷид ва ҳусайнияи «Хадиҷа-ул-Кубро» дар минтақаи «Терлай», воқеъ дар шаҳри Исломобод рух додааст.
Гузоришҳои расонаӣ нишон медиҳанд, ки пулис ва нерӯҳои амниятӣ минтақаи атрофи маҳалли ҳодисаро ба муҳосира гирифта, таҳқиқотро оғоз намудаанд, то муайян гардад, ки оё таркиш бар асари амалиёти интиҳорӣ рух додааст ё натиҷаи бомбгузории қаблан тарҳрезишуда мебошад.
4332716
