Донишгоҳи Қуръонӣ дар «Паҳанғ» Малайзия таъсис хоҳад ёфт
Ба гузориши Икно ба нақл аз Bernama, масъулони иёлати Паҳанг Малайзия пас аз ба даст овардани розигии султон барои тағйири номи як муассисаи олии таълимӣ, донишгоҳи тахассусӣ дар илмҳои Қуръонӣ таъсис хоҳанд дод.
Абдуллоҳ Раъиятуддин ал-Мустафоӣ, султани Паҳанг, номи донишгоҳи Исломии Султон Аҳмад Шоҳ (Unipsas) -ро ба «Донишгоҳи Қуръон» (جامعة القرآن) тағйир дод. Ин нахустин донишгоҳи аз ин навъ дар Малайзия хоҳад буд.
Султон Абдуллоҳ гуфт, ки кӯшишҳо барои нигоҳ доштани Ислом дар Паҳанг тавассути донишгоҳе, ки ба омӯзиши Қуръон бахшида мешавад, таҳким хоҳад ёфт.
Ӯ афзуд, ки ин иқдом чизе бештар аз тағйири ном мебошад ва нишондиҳандаи равшани раванд ва самти омӯзишҳои Қуръонӣ ҳамчун нишонаи афзоиши фикрӣ ва маънавии ин иёлат аст.
Ӯ рӯзи ҷумъа дар як паёми худ дар сафҳаи Facebook навишт: «Ин иқдом, монанди сохтани як ёдгории таърихӣ дар иёлат, мақсади худро ба таври равшан нишон медиҳад.»
Ӯ инчунин рӯзи панҷшанбе дар маросими хитоёти шонздаҳумин даври мусобиқаи Қуръон ва ҳифзи Қуръон дар шаҳри «Ҷубили Прак Султон Ҳоҷӣ Аҳмад Шоҳ» суханронӣ кард ва изҳори умедворӣ намуд, ки донишгоҳи Қуръон, ки таъсиси он ба зудӣ эълон хоҳад шуд, фаҳмиши умумиро дар бораи Қуръон густариш медиҳад ва олимон, муаззинҳо ва роҳбаронеро, ки дар илмҳои марбут ба ваҳйи илоҳӣ ихтисос доранд, тарбия хоҳад кард.
Вай дар пешвози моҳи мубораки Рамазон аз мардум даъват кард, ки бо ихлос ва фидокорӣ омода шаванд ва ин моҳро ҳамчун мактабе барои рӯҳ ва вақте барои таҳкими иртиботи инсон бо Халиқ арзёбӣ кард.
Султон таъкид кард, ки зебоии моҳи Рамазон дар эҳтиром, таҳаммул ва кӯмак ба ниёзмандон пинҳон аст, то баракатҳои он ба ҳамаи мардум бирасад.
Дар ин маросим, «Зулҳашмӣ Муҳаммад Юнус» ҳамчун қории беҳтарин интихоб гардид ва «Нуруссаъада Муҳаммад Зайни» беҳтарин қории бахши занон эълон шуд.
4332818
