Таъсири моҳи Рамазон бар раванди хариди истеъмолкунандагон дар кишварҳои арабӣ
Ба гузориши Икно ба нақл аз Sky News, Рамазон танҳо як муносибати мазҳабӣ нест; ин моҳ ҳамчунин як фасли иқтисодӣ аст, ки намунаҳои истеъмолро дар ҷаҳони араб ва кишварҳои исломӣ ба шакли назаррас дигаргун месозад.
Дар тӯли ин моҳ, бозорҳо шоҳиди афзоиши чашмгири талабот ба маводи ғизоии асосӣ, шириниҳо ва нӯшокиҳои суннатии Рамазон мешаванд.
Ширкатҳои маҳаллӣ ва ҳатто байналмилалӣ маъмулан стратегияҳои худро барои посухгӯӣ ба ин афзоиши истеъмол танзим мекунанд ва моҳи Рамазонро ба фасли тиллоӣ барои касбу корҳо дар бахшҳои гуногун табдил медиҳанд.
Таъсири Рамазон фаротар аз ғизо ва нӯшиданӣ рафта, ба бахшҳои фанноварӣ ва фароғат низ густариш меёбад. Платформаҳои рақамӣ, барномаҳои таҳвили фармоиш ва мағозаҳои онлайн афзоиши қобили таваҷҷуҳ дар талаботро таҷриба мекунанд.
Ин тағйир дар рафтори истеъмолкунанда нишон медиҳад, ки чӣ гуна одобу русуми иҷтимоӣ метавонанд қудрати хариди мардумро самт диҳанд ва барои брендҳо имкониятҳои навоваронаи бозорёбиро фароҳам созанд.
Рамазон ҳамчунин ба бахши хизматрасонӣ ва гардишгарии дохилии минтақа таъсир мерасонад, зеро хонаводаҳо ба сӯи тарабхонаҳо ва меҳмонхонаҳое, ки хизматрасониҳои вижа пешниҳод мекунанд, рӯ меоранд. Илова бар ин, хароҷоти марбут ба ҳадяҳои ин муносибат низ афзоиш меёбад.
Ин таҳаввулот таъкид мекунад, ки моҳи рӯза на танҳо як маросими мазҳабӣ, балки муҳаррики иқтисодист, ки ҳам ба истеъмолкунандагон ва ҳам ба соҳибкорон суд мерасонад ва нақши фарҳанг ва суннатро дар тағйири мавсимии манзараи иқтисодии кишварҳои араб тақвият мекунад.
4335276
