Ба гузориши Икно ба нақл аз «Садои Афғон», Окиф Муҳоҷир, сухангӯи вазорати амр ба маъруфи ҳукумати сарпарасти Афғонистон, бо ишора ба тахриби як мадрасаи динӣ ва беҳурматӣ ба нусхаҳои Қуръон дар минтақаи Марғии вулусволии Бармал, таъкид кард, ки ин «таҷовуз беҷавоб нахоҳад монд».

Окиф Муҳоҷир дар сафҳаи расмии худ дар шабакаи иҷтимоии Икс, дар вокуниш ба ҳамлаҳои ҳавоии Покистон навишт:
«Қуръонҳои пора-порашуда дар мадрасаи Бармал қатъан беҷавоб нахоҳад монд. Касе ки наметавонад амнияти худро таъмин кунад, набояд дигаронро маломат намояд. Бояд бидонанд, ки ин моҷаро барояшон бисёр сахт анҷом хоҳад ёфт.»

Ин паём, ки лаҳни таҳдидомез ва ҳушдордиҳанда дорад, нахустин вокуниши расмии мақомоти Толибон дар Афғонистон ба ҳамлаҳои шаби гузашта ба шумор меравад.

Бар асоси гузоришҳои дарёфтшуда, артиши Покистон шаби шанбе, дуюми исфанд, ҳамлаҳои ҳавоии густардаеро алайҳи манотиқе аз хоки Афғонистон анҷом додааст.

Манобеи маҳаллӣ ва тасвирҳои мунташиршуда таъйид мекунанд, ки ҷангандаҳои покистонӣ дар вулусволии Бармали вилояти Пактика як мадрасаи диниро ҳадаф қарор додаанд.

Тасвирҳои нашршуда аз ин мадраса нишондиҳандаи тахриби густарда ва оташсӯзӣ дар ин макони муқаддас аст.

Бар асоси ин тасвирҳо, саҳифаҳои Қуръони Карим дар ин ҳамла пора ва сӯхта шудаанд, китобҳои динӣ ва дуоҳо тӯъмаи ҳариқ гашта ва хисороти сангине ба таъсисоти мадраса ворид шудааст.

Лаҳни тунду сареҳи ин паём ҳокӣ аз он аст, ки мақомоти Кобул ин иқдомро таҷовузи ошкор ба ҳокимият ва тамомияти арзии Афғонистон талаққӣ мекунанд.

4336037