Намоиши намунаи дари Каъба дар Осорхонаи Қуръони Макка

Осорхонаи Қуръон дар маҳаллаи фарҳангии «Ҳиро» дар Маккаи Мукаррама намунаи дари Каъбаро барои тамошои мардум ба намоиш гузоштааст.

Ба гузориши икно, иқтибос аз вебгоҳи рӯзномаи саудии «Макка», дари хонаи Худо яке аз барҷастатарин намунаҳои ҳамгироии зебоии ҳунарӣ бо арзишҳои маънавии тамаддуни исломӣ мебошад, ки тарзи истифодаи оятҳои Қуръонро дар хаттотии арабӣ ва ороишоти исломӣ ба шакли нав ва эҷодкорона ба намоиш мегузорад.

Асли ин дар ба даврони подшоҳ Холид ибни Абдулазиз бармегардад, ки соли 1979 милодӣ аз тиллои холис сохта шуда буд ва бо ҷузъиёти дақиқ ва нақшу нигори бойи исломии худ фарқ мекунад.

Ин дар дорои хаттотии оятҳои Қуръон аст, ки бахше аслии ҳувияти тарҳи онро ташкил медиҳад ва ҳамбастагии ҳунарии он ҷойгоҳи Каъбаро ва муқаддас будани онро дар рӯҳу ҷони мусалмонон инъикос мекунад.

Намунаи ба намоиш гузошташуда дар осорхона ҷанбаи зебоишиносии хатти арабиро, ки яке аз муҳимтарин ҳунарҳои исломӣ ва таърихан вобаста ба навиштани Қуръон мебошад, равшан мекунад.

Ин намоиш дар чорчӯби рисолати Осорхонаи Қуръони Макка сурат мегирад, ки ҳадафаш нишон додани таваҷҷуҳи мусалмонон дар тӯли асрҳо ба мусҳафи шариф ва сабти марҳилаҳои китобат ва чопи Қуръон буда, огоҳии фарҳангӣ ва динии боздидкунандагонро тақвият мебахшад.

Ин осорхона ба сабаби муҳтавои боэътимоди маърифатӣ ва таҷрибаҳои навоваронаи намоишӣ, мавриди истиқболи рӯзафзуни боздидкунандагон ва дӯстдорони мероси исломӣ қарор гирифтааст ва ба таҳкими ҷойгоҳи Макка ҳамчун маркази равшани фарҳанги исломӣ ва тамаддуни башарӣ мусоидат мекунад.

4346922