Намоиши Қуръони хаттии нодир дар осорхонаи мероси исломии Таиланд
Ба иттилои икно ба нақл аз nst, як нусхаи хаттии Қуръон, ки гумон меравад синни он беш аз 1000 сол бошад, дар осорхонаи мероси фарҳангии исломӣ ва маркази таълими Қуръон дар Наратҳиват, Таиланд ба намоиш гузошта шудааст.
Ин нусхаи хаттӣ, ки тақрибан 50 килограмм вазн дорад, дар давраи Аббосиён бо истифода аз 346 варақ, ки аз пӯсти ҳайвонот ва зарфи табиӣ сохта шудаанд, китобат шудааст ва ба яке аз осори нодир ва арзишманди исломии нигаҳдорӣшаванда дар минтақа табдил ёфтааст.
Ник Илҳом Ник Юсуп, масъули осорхона гуфт, ки қадимтарин асари таърихии осорхона бо маҳорати истисноӣ ва бо истифода аз садҳо пӯсти ҳайвоноти коркардшуда барои сохтани варақҳои пойдор барои навиштани Қуръон таҳия шудааст. Вай гуфт: "Ҳамаи ашёи хом махсус аз Ҳазрамоти Яман оварда шудаанд."
Ин нусхаи хаттӣ, ба ғайр аз истифодаи маводҳои табиӣ, ҳамчунин ифодагари навоварии ҷомеаҳои аввалини мусулмонӣ дар истифодаи унсурҳои муҳити атроф мебошад ва комилан бо даст ва бо хатти куфӣ китобат шудааст.
Азбаски ин нусхаи хаттӣ комилан аз унсурҳои табиӣ сохта шудааст, ҳифзи он ба усулҳои дақиқи муҳофизатӣ ва ба дур аз маводҳои кимиёвӣ ва ҳалкунандаҳои муосир ниёз дорад. Корҳои тозакунӣ ва таъмир ҳар шаш моҳ як бор анҷом дода мешавад.
Вай гуфт, ки ин нусхаи хаттӣ сафари худро аз Яман ба ҷазираҳои Малай дар замони Шайх Ҷамолиддин, воизи мусулмон оғоз кардааст.
Ба гуфтаи ӯ, ин нусхаи хаттӣ беш аз 500 сол дар Индонезия нигаҳдорӣ мешуд, то ин ки тақрибан панҷ сол пеш дар давраи пандемияи Коронавирус ба Наратҳиват оварда шуд.
Вай гуфт: "Барои таъмини ҳифзи ин мероси арзишманди тамаддуни исломӣ, тартиботи амниятии сахтгирона ҷорӣ карда мешавад ва ба меҳмонон иҷозат дода намешавад, ки ин асари нодирро ламс кунанд."
4351172
