Баргузории мусобиқаҳои Қуръон дар масҷиди тозатаъсиси мусулмонони Русия
Ба гузориши икно ба нақл аз «Русия ал-Явм», деҳаи «Кардоникская» дар Ҷумҳурии «Қарачай — Черкесия» дар шимолу ғарби минтақаи Қафқоз, мизбони маросими расмии ифтитоҳи масҷиди ҷомеи наве буд; рӯйдоди муҳиме, ки ҷойгоҳи динӣ ва фарҳангии мусулмонони минтақаро таҳким бахшид.
Барномаи ифтитоҳи ин масҷид бо баргузории мусобиқаи Қуръони Карим дар чаҳорчӯби рақобатҳои саросарии ҳифзи Қуръон дар Русия ҳамроҳ буд ва нахустин намози ҷамоат низ дар ҳамин масҷид баргузор гардид. Ҳамзамон, муфтии Ҷумҳурии «Қарачай — Черкесия» ба таври расмӣ унвони «масҷиди ҷомеъ»-ро ба ин маркази динӣ эҳдо кард.
Дар ин маросим ҳазорон меҳмон аз минтақаҳои гуногуни Русия ширкат доштанд ва намояндагони доираи васеи ниҳодҳои исломӣ ва иҷтимоӣ низ ҳузур ёфтанд. Дар садри ҳозирон, шайх «Сулаймон Самидинов», намояндаи Идораи динии мусулмонони Ҷумҳурии Қрим ва шаҳри Севастопол, имоми минтақаи «Красногвардейский» ва раиси мадрасаи ҳифзи Қуръони вобаста ба Идораи рӯҳонии мусулмонони Қрим ва Севастопол ҳузур дошт.
Шайх Сулаймон Самидинов дар суханронии худ бар аҳаммияти ваҳдати уммати исломӣ ва ҳифзи арзишҳои аслии динӣ таъкид карда, гуфт: «Ин масҷид танҳо маконе барои баргузории намоз нахоҳад буд, балки ба марказе барои омӯзиши динӣ, фаъолиятҳои хайриявӣ ва хизматрасонии иҷтимоӣ табдил мешавад.»
Ин маросим бо ҳузури густурдаи сокинони маҳаллӣ, уламо, намояндагони ниҳодҳои давлатӣ ва созмонҳои ҷамъиятӣ баргузор шуд. Ҳамчунин, ширкаткунандагони мусобиқаи Қуръони Карим аз минтақаҳои гуногуни Русия дар ин рӯйдод ҳузур доштанд; ҳузуре, ки рамзи ҳамбастагӣ ва ҳамкорӣ миёни мусулмонони Русия ба шумор мерафт.
4354819
