Эълони ҷанг аз ҷониби як хохоми исроилӣ алайҳи артиш ва давлати Нетаняҳу
Ба гузориши икно бо истинод ба «Русия ал-Явм», изҳороти раҳбарони динӣ ва сиёсии яҳудиёни ҳаридӣ аз амиқ будани ихтилофҳои дохилӣ дар сарзаминҳои ишғолшуда бар сари буҳрони хизмати ҳатмии ҳарбии яҳудиёни мутаассиб шаҳодат медиҳад.
Моше Ҳиллел Ҳерш, яке аз барҷастатарин раҳбарони ҷараёни ҳаридии литвонӣ, дар ҳамоиши Иттиҳоди донишҷӯёни мадрасаҳои динӣ дар Қудси ишғолшуда гуфт, ки ҷомеаи ҳаридӣ даргири як ҷанги воқеӣ шудааст. Ӯ афзуд: «Ман дар бораи ҷанг бо Эрон сухан намегӯям, балки дар бораи ҷанг алайҳи касоне ҳарф мезанам, ки дар миёни мо ҳастанд ва бо мо меҷанганд.»
Ҳерш таъкид кард, ки хизмати ҳатмии ҳарбӣ барои афроди мазҳабӣ таҳдиди мустақим ба он чизест, ки ӯ онро «ҷаҳони Таврот» номид. Ӯ иддао кард, ки мухолифони ҳаридиҳо қасди аз байн бурдани ин ҷаҳонро доранд ва аз ҷомеаи ҳаридӣ хост, ки барои пешгирӣ аз таҳмили хизмати ҳарбӣ ба донишҷӯён ва толибилмони мадрасаҳои динӣ муборизаро идома диҳанд.
Вай бо ишора ба буҳрони қонуни озодкунӣ аз хизмати ҳарбӣ гуфт, ки ҷонибдорони ин қонун мехостанд тақрибан нисфи ҷавонони ҳаридиро ба артиш ҷалб кунанд, аммо ҳадафи воқеии онҳо тағйир додани тарзи зиндагии ҷомеаи ҳаридӣ ва заиф кардани ниҳодҳои динии он мебошад.
Яаков Ашер, намояндаи Кнессет аз ҳизби динии Иттиҳоди яҳудиёни Таврот, ин буҳронро «ҷанги мазҳабӣ» номид ва гуфт, ки ҳаридиҳо ба гурӯҳҳои ниманизомӣ табдил нахоҳанд шуд, аммо дар муқобили он чизе, ки ҳадаф қарор додани ҷомеаи худ медонанд, аз дастурҳои раҳбарони динии худ пайравӣ хоҳанд кард.
Ин изҳорот аз афзоиши шикоф дар ҷомеаи саҳюнистӣ дарак медиҳад. Ин буҳрон дар ҳоле идома дорад, ки музокирот дар бораи қонуни хизмати ҳарбӣ пас аз ду соли баҳсу гуфтугӯ ба бунбаст расидааст. Сабаби ин вазъ мухолифати раҳбарони мазҳабии ҳаридӣ бо тарҳи пешниҳодии Кумитаи корҳои хориҷӣ ва амниятии Кнессет дар бораи хизмати ҳарбии ҳатмии яҳудиёни мутаассиб мебошад.
4356416
