Əl-Əzhər Quran Mərkəzinin dördüncü yay Qurani layihəsinin detalları açıqlanıb
“İQNA”-nın “Misri əl‑Yəvm”-ə istinadən verdiyi xəbərə görə, bu layihə 1 iyun–31 avqust 2026 tarixləri arasında, Əl-Əzhərin şeyxi Əhməd ət‑Tayyibin nəzarəti ilə icra olunacaq.
Bu ilki proqram müxtəlif yaş qrupları üçün geniş Qurani və tədris paketləri təqdim edir və Quranın əzbərlənməsi, təkrarı və təfəkkürünü, həmçinin sünnənin dirçəldilməsini bir araya gətirərək gənclərin Qurana və Peyğəmbər (s) sünnəsinə bağlılığını gücləndirməyi hədəfləyən kompleks tədris‑təbliğ modeli yaradır.
Yay Qurani layihəsi ardıcıl dördüncü ildir həyata keçirilir və əvvəlki illərdə şagirdlər və valideynlər tərəfindən geniş qarşılanıb.
Bu layihənin uğurlu icrası və misirlilərin böyük marağı onu Əl-Əzhərin Qurani elmlərin yayılması və orta yolçu İslam dəyərlərinin möhkəmləndirilməsi istiqamətində ən mühüm təşəbbüslərindən birinə çevirib.
Layihənin əsas istiqamətləri
- “10 min Quran xətm edən” layihəsi — məqsəd Əl-Əzhərin nəzarətində fəaliyyət göstərən 12 minə yaxın özəl Quran hifz mərkəzində bütün Quranı əzbərləmiş 10 min nəfərin məzun edilməsidir.
- “Dərs proqramını əzbərlə” təşəbbüsü — Əl-Əzhər institutlarının tələbələri üçün hazırlanıb.
Həftədə üç gün keçirilən bu proqram tələbələrə növbəti tədris ilinin dərs materiallarını yay tətilində əzbərləməyə kömək edir və yeni il ərzində tədris yükünü azaldır.
- “Qurani‑Kərim Platforması” — Əl-Əzhər tələbələri və yay aylarında Quran əzbərləmək istəyən digər şəxslər üçün məsafədən hifz xidmətləri təqdim edən onlayn platformadır.
Bu təşəbbüs Əl-Əzhərin rəqəmsal tədris alətlərindən istifadə strategiyasına uyğundur.
- Hədis oxu və dinləmə məclisləri — Peyğəmbər (s) sünnəsinin dirçəldilməsi məqsədilə Əl-Əzhərin institut və hifz mərkəzlərində keçirilir. Bu proqram, Həzrət Peyğəmbərin (s) mövlud ayı ilə eyni vaxtda həyata keçirilir.
- “Quranı əzbərdən oxuma Dünya Günü” tədbirləri — hər il 30 avqustda keçirilir.
Proqrama bir gündə bütün Quranın və ya müəyyən hissələrinin oxunması daxildir. Ötən il bu tədbirdə Misirdən 100 mindən çox, digər ölkələrdən isə minlərlə insan iştirak edib.
4352078
