Ayətullah Dəqqaqın Bəhreyndə din xadimlərinin özbaşına həbslərinə reaksiyası
“İQNA”-nın Şeyx Dəqqaqın mətbuat katibliyinə istinadən verdiyi xəbərə görə, Ayətullah Şeyx Abdullah Dəqqaq, Qumda yaşayan bəhreynlilərin dini məktəbinin direktoru bir mesajında Bəhreyn hökumətinin bir qrup şiə din xadimini özbaşına həbs etməsi hərəkətini pisləyərək, bu təhlükəli addımı söz və əqidə azadlığının açıq şəkildə pozulması hesab edib. Mesajın mətni belədir:
"Bismillahir-rəhmanir-rəhim
Bəhreyn hökumətinin bir qrup şiə din xadimini özbaşına həbs etməsi hərəkətini şiddətlə pisləyirik. Bu təhlükəli addım söz və əqidə azadlığının açıq şəkildə pozulması, həm ilahi təlimatlarda, həm də beynəlxalq qanun və konvensiyalarda tanınmış dini və mülki hüquqlara açıq təcavüzdür.
Din xadimlərini, mütəfəkkirləri və söz azadlığı sahiblərini boş ittihamlar və bəhanələrlə hədəfə almaq nəinki ölkənin sabitliyinə və əmin-amanlığına kömək edir, əksinə, Bəhreyndə gərginliklərin artmasına və siyasi-hüquqi böhranın dərinləşməsinə səbəb olacaq; xüsusən də din xadimləri həmişə islahatlara dəvət və ümumi sülh və əmin-amanlığın möhkəmləndirilməsində mühüm rol oynayıblar.
Vurğulayırıq ki, dini azadlıqları məhdudlaşdırmaq və dini və intellektual şəxsiyyətlərlə mübarizə siyasətinin davam etdirilməsi yalnız cəmiyyətdə narazılığın və gərginliyin artmasına gətirib çıxaracaq. Həmçinin bu hərəkətlərin və onların ictimai təhlükəsizlik və rahatlığa mənfi təsirlərinin tam məsuliyyəti Bəhreyn hökumətinin üzərinə düşür.
Bunun əsasında, dini və siyasi baxışlarına və mövqelərinə görə həbs edilmiş bütün din xadimlərinin və şəxslərin dərhal və qeyd-şərtsiz azad edilməsini tələb edirik.
Vətəndaşlara, din xadimlərinə və dini xətiblərə qarşı özbaşına həbslər və təhlükəsizlik çağırışları siyasətinin dayandırılmasını tələb edirik.
Beynəlxalq hüquq müdafiə təşkilatlarından və qurumlarından Bəhreyndə davam edən insan hüquqlarının pozulmasına qarşı öz hüquqi və mənəvi məsuliyyətlərini yerinə yetirmələrini xahiş edirik.
Həbs olunmuşların ailələri və Bəhreyn xalqı ilə ədalət, insan ləyaqəti tələbində və ictimai azadlıqların qorunmasında tam həmrəy olduğumuzu bildiririk."
4351364
