Mako Na Ashirin Da Uku A Jere Ana Hana Sallar Juma'a A Bahrain

Bangaren kasa da kasa, Al'ummar kasar Bahrain na ci gaba da bayar da kariya ga babban malamin addinin muslunci na kasar Sheikh Isa Kasim, a yunkurin da masarautar kama karya ta kasar ke yi na neman kame shi tun kimanin watannin biyar da suka gabata.

Kamfanin dillancin labaran kur'ani na iqna ya habarta cewa, Tashar talabijin ta Almanar ta bayar da rahoton cewa, dubban mutanen kasar Bahrain ne suke ci gaba da yin zaman dirshan a cikin unguwar Diraz da ke gefen birnin manama fadar mulkin kasar.

A cikin watannin da suka gabata ne dai masarautat Bahrain ta sanar da cewa ta janye izinin zama dan kasa daga sheikh Isa Kasim, saboda goyon bayan masu adawa da gwamanti da masarautar ta ce yana yi.

Tun bayan da masarautar Bahrain ta sanar da janye izinin zama dan kasa daga kan malamin kimanin makonni 23 da suka gabata, ta hana gudanar da sallar Juma'a a yankin na Diraz baki daya, musamman a masallacin Imam Sadiq (AS) da shehin malamin ke bayar da sallar Juma'a.

Ko a cikin wannan makon daruruwan jami'an 'yan sandan masarautar Bahrain tare da rakiyar motoci masu sulke sun kai farmaki a unguwar Diraz da nufin kama sheikh Isa Kasim, amma dubban jama'a da ke wurin sun tare gabansu, tare da hana su isa zuwa gidan, lamarin da ya tialsta 'yan sanda ficewa daga yankin babu shiri.

3555961