Ministan Tsaron kasar Sudan Ya Rasu A Yau
Teharn (IQNA) kakakin rundunar sojin Sudan ya sanar da cewa ministan tsaron kasar Jamaluddin Umar ya rasu.
Tashar Russia Today ta bayar da rahoton cewa, Laftanar Janar Jamaluddin Umar yana halartar wani taron tattaunawar sulhu tare da ‘yan tawayen Sudan a birnin Juba na Sudan ta kudu.
Rahoton ya ce, Umar ya rasu ne sakamakon tsayawar zuciyarsa daga aiki, kuma a halin yanzu haka na birnin na Juba ana gudanar da shirye-shiryen dauko gawarsa zuwa birnin Khartum.
Jamaluddin dai ya kasance tsohon shugaban hukumar leken asiri ta kasar Sudan a lokacin mulkin Umar Hassan Albashir, amma bayan hambarar da Albashir, Abdulfattah Burhan ya sanya a matsayin daya daga cikin mammbobin majalisar mulki ta kasar, daga bisani kuma ya ba mukamin ministan tsaro na kasar ta Sudan.
