Tilasta yin amfani da Katin ID na musamman ga mahajjata
Ma’aikatar kula da aikin hajji da umrah ta kasar Saudiyya ta sanar da cewa, an fara bayar da katunan aikin hajji mai suna Nusuk da ke taimakawa wajen tantance maniyyatan da ba su da izini.
An fara wannan aiki ne makonni kadan da fara aikin Hajjin bana, kuma ya zuwa yanzu an bayar da fiye da kati 150,000 na irin wannan.
Wannan kati yana ƙunshe da muhimman bayanai kamar wurare masu tsarki da ke biranen Makka, Madina da sauran wurare masu tsarki, da kuma bayanan tuntuɓar kamfanonin sabis. Wannan yana saukaka nuna wa mahajjata abubuwa da dama da kuma rage hadarin bacewa.
Har ila yau, wannan kati ya ƙunshi duk bayanan lafiyar alhazai. Jami’ai sun ce daukar katin ya zama wajibi ga dukkan mahajjata a lokacin aikin Hajji. Ana ci gaba da buga katin har sai an cika dukkan izini da biza da suka shafi aikin Hajji.
Ana buga waɗannan katunan da inganci da ƙa'idodin aminci. Jami’an tsaro suna hana kwafi ba bisa ƙa'ida ba. Wannan kati yana nuna halaccin mahajjaci. Alhazan kasashen ketare na karbar wadannan katunan ne bayan shiga kasar Saudiyya, yayin da mahajjatan cikin gida ke karbarsu daga kamfanonin hidima kafin a fara aikin Hajji.
A baya ma'aikatar aikin Hajji da Umrah ta Saudiyya ta sanya ranar 29 ga watan Afrilu a matsayin wa'adin dukkan maniyyata aikin Umrah na kasashen waje da su bar kasar.
