‘Awa para sa mga Mundo’ Pandaigdigang Piyesta, Planong Gawin sa Iraq para sa Kaarawan ng Propeta
Ang Astan (pangangalaga) ng banal na dambana ni Hazrat Abbas (AS) ang magsasagawa ng naturang kaganapan, ayon sa website ng Global Kafeel Network (Pandaigdigang Himpilan ng Kafeel).
Isang paunang pagpupulong ang naganap ngayong linggo sa Astan upang talakayin at magpalitan ng mga pananaw tungkol sa kinakailangang mga paghahanda para sa pagdaraos ng kaganapan at paggunita sa ika-1,500 anibersaryo ng pinagpalang kapanganakan ng Banal na Propeta (SKNK).
Ayon kay Sayed Aqil al-Yasiri, pinuno ng Kagawaran ng Pangkaisipan at Pangkulturang mga Gawain ng Astan, tinalakay sa pagpupulong ang mga aktibidad at mga programa na idaraos mula ika-12 hanggang ika-18 ng buwang Rabi al-Awwal sa kalendaryong Hijri.
Kasama sa mga aktibidad ang mga programa sa loob at labas ng banal na dambana ni Hazrat Abbas (AS), gayundin ang mga programang pang-agham at pangkultura sa pakikipagtulungan ng mga unibersidad sa Iraq.
Magsusugo rin ng mga imbitasyon para sa mga kalahok mula sa labas ng Iraq, kabilang ang mga mananaliksik, akademiko, tagapagbasa ng Quran, at mga personalidad mula sa seminaryo, upang mabigyan ang mga aktibidad ng mas malawak na pang-agham at pangkulturang aspeto, aniya.
Sa pamamagitan ng pagsasagawa ng mga kaganapan kaugnay ng mga Hindi Nagkakamali (AS), layon ng Astan na maiparating sa lipunan ang kaalaman, mga birtud, at ang Seerah ng Ahl-ul-Bayt (AS).
