Rushewar tulluwa a babban Masallacin Jakarta na kasar Indonesia sakamakon gobara

Tehran (IQNA) Babbar tulluwa ta masallacin cibiyar Musulunci ta birnin Jakarta, babban birnin Indonesiya, ta rufta a jiya sakamakon wata mummunar gobara.

A cewar Jakarta Globe, babbar tulluwa ta masallacin Jakarta Islamic Center a Indonesia ta ruguje a ranar Laraba 27 ga watan Oktoba bayan da wata gobara ta tashi.

A cewar majiyoyin yankin, babu wanda ya samu rauni a wannan lamarin, kuma gobarar ba ta yadu zuwa sauran sassan ginin. An buga hotuna a shafukan sada zumunta da ke nuna lokacin da kubbar masallacin ya rufta. Wadannan hotuna sun nuna wuta da hayaki na fitowa daga kubbar masallacin.

An aike da jami’an kashe gobara zuwa wurin jim kadan bayan da gobarar ta tashi a masallacin Islamic Center na Jakarta. An baza injinan kashe gobara 10 domin shawo kan gobarar. Har yanzu dai ba a san musabbabin tashin gobarar ba, kuma ‘yan sanda sun fara gudanar da bincike don gano musabbabin tashin gobarar.

‘Yan sanda sun yi wa ‘yan kwangilar da ke aiki a wurin tambayoyi. Binciken farko ya nuna cewa gobarar ta tashi ne a lokacin da ake yin walda a rufin masallacin.

Baya ga masallacin, cibiyar islamiyya tana da wuraren kasuwanci, bincike da ilimantarwa. Ya kamata a lura da cewa a karo na karshe da kubbabin masallacin ya yi gobara a watan Oktoban 2002 kuma an dauki sa'o'i biyar ana shawo kan gobarar.

4093163